انٹربینک: ڈالر کے مقابلے میں روپیہ مزید مضبوط

انٹربینک مارکیٹ میں جمعرات کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسیٹ بینک کے مطابق کاروبار کے اختتام پر ڈالر کے مقابلے میں روپیہ 3 پیسے کی بہتری سے 277.42 روپے پر بند ہوا۔

یاد رہے کہ بدھ کو مقامی کرنسی 277.45 روپے پر بند ہوئی تھی۔

عالمی سطح پر جمعرات کو ین نے اپنی قدر میں ہونے والے اضافے کو برقرار رکھا جو گزشتہ سیشن میں اچانک اور مختصر تیزی کے بعد سامنے آیا تھا۔ ٹریڈرز کا خیال ہے کہ ین کی اس تیزی کے پیچھے ممکنہ طور پر حکومتی حکام کا کردار ہوسکتا ہے جس کے باعث اہم امریکی روزگار رپورٹ کے اجرا سے قبل ڈالر پر دباؤ برقرار رہا۔

ین کی قدر امریکی ڈالر کے مقابلے میں 158.88 ین فی ڈالر پر مستحکم رہی جب کہ گزشتہ روز اس کی قدر میں 0.9 فیصد اضافہ ہوا تھا جس کے بعد مارکیٹ کے شرکا ٹوکیو کی جانب سے باضابطہ مداخلت کے ممکنہ اقدام پر نظر رکھے ہوئے ہیں۔

31 جولائی کو امریکا اور جاپان کی جانب سے ین کی خریداری کے لیے نایاب مشترکہ مداخلت کے بعد سے ین کو مسلسل اور پائیدار حمایت حاصل کرنے میں مشکلات کا سامنا ہے جب کہ شرحِ سود میں اب بھی موجود وسیع فرق، مالی خدشات اور توانائی کی قیمتوں میں ایک بار پھر نمایاں اضافے کے باعث ین پر دباؤ برقرار ہے۔

وسیع تر مارکیٹ میں ین کی مضبوطی کے باعث امریکی ڈالر دباؤ میں رہا جبکہ یورو معمولی اضافے سے 1.1589 ڈالر کا ہوگیا۔ پاؤنڈ اسٹرلنگ نے تین ہفتوں کی کم ترین سطح سے بحالی کی کوشش کی اور آخری بار 1.3482 ڈالر پر خریدا گیا۔

کرنسیوں کی ایک ٹوکری کے مقابلے میں امریکی ڈالر کی قدر 0.04 فیصد کم ہوکر 99.56 ہوگئی۔ کینیڈین ڈالر نے بھی گزشتہ روز کے فوائد برقرار رکھے اور 1.3836 کینیڈین ڈالر فی امریکی ڈالر پر رہا۔