مغل انرجی نے 31.5 میگاواٹ کا کیپٹو ہائبرڈ پاور ٹربائن فعال کردیا

مغل انرجی لمیٹڈ (ایم ای ایل) جو مغل آئرن اینڈ اسٹیل انڈسٹریز لمیٹڈ کی ذیلی کمپنی ہے نے پیر کو بتایا کہ اس نے اپنے کیپٹو ہائبرڈ پاور پلانٹ منصوبے کی مرکزی 31.50 میگاواٹ ٹربائن کامیابی سے فعال کردی ہے۔

کمپنی نے پاکستان اسٹاک ایکسچینج کو اس پیش رفت سے آگاہ کیا۔

تمام ضروری ٹیسٹنگ اور کمیشننگ کے مراحل کامیابی سے مکمل کرنے کے بعد ادارے نے اپنی کمرشل آپریشن ڈیٹ حاصل کرلی اور وہ تجارتی بلنگ شروع کرنے کے لیے مکمل طور پر تیار ہے۔

16 فروری 2010 کو پاکستان میں پبلک لمیٹڈ کمپنی کے طور پر منسوخ شدہ کمپنیز آرڈیننس 1984 (اب کمپنیز ایکٹ 2017) کے تحت قائم ہونے والی مغل آئرن اینڈ اسٹیل انڈسٹریز لمیٹڈ فیرس اور نان فیرس کاروباری شعبوں میں کام کرتی ہے۔

تاہم، کمپنی کی بنیادی سرگرمی فیرس شعبے میں مائلڈ اسٹیل مصنوعات کی تیاری اور فروخت ہے۔