خیبر پختونخوا اور بلوچستان میں سکیورٹی فورسز کی کارروائیاں، 49 دہشت گرد ہلاک

سکیورٹی فورسز نے پولیس کے ساتھ مشترکہ انٹیلی جنس بیسڈ آپریشنز کے دوران گزشتہ چند روز میں خیبر پختونخوا اور بلوچستان میں 49 دہشت گردوں کو ہلاک کر دیا۔

پاک فوج کے شعبہ تعلقات عامہ کے مطابق یہ کارروائیاں جاری انسدادِ دہشت گردی مہم کے تحت دہشت گرد نیٹ ورکس اور بھارتی سرپرستی میں سرگرم عناصر، جن میں فتنۃ الخوارج اور فتنۃ الہندوستان شامل ہیں، کے خلاف کی گئیں۔

خیبر پختونخوا میں بنوں، شمالی وزیرستان، اورکزئی اور خیبر کے اضلاع میں متعدد تیز رفتار انٹیلی جنس بیسڈ آپریشنز کے دوران فتنۃ الخوارج سے تعلق رکھنے والے 12 دہشت گرد ہلاک کیے گئے۔

آئی ایس پی آر کے مطابق کارروائیوں کے دوران بڑی مقدار میں دھماکا خیز مواد، آئی ای ڈی کو دھماکے سے اڑانے والے آلات، اسلحہ، گولہ بارود اور موٹر سائیکلیں بھی برآمد کرکے تلف کر دی گئیں۔

بلوچستان میں مستونگ، مچھ، خضدار اور پنجگور کے اضلاع میں کیے گئے 10 انٹیلی جنس بیسڈ آپریشنز کے دوران فتنۃ الہندوستان سے تعلق رکھنے والے 37 دہشت گرد ہلاک کیے گئے۔

سکیورٹی فورسز نے کارروائیوں کے دوران بڑی مقدار میں اسلحہ، دھماکا خیز مواد سے بھرے ڈرم اور ریموٹ ڈیٹونیشن آلات بھی قبضے میں لے کر تلف کر دیے۔

آئی ایس پی آر کے مطابق علاقوں میں ممکنہ طور پر موجود دیگر دہشت گردوں کے خاتمے کے لیے کلیئرنس آپریشنز جاری ہیں۔ سکیورٹی فورسز اور قانون نافذ کرنے والے ادارے غیر ملکی سرپرستی میں ہونے والی دہشت گردی کے خطرے کے خاتمے کے لیے پرعزم ہیں۔

پاک فوج کے مطابق قومی ایکشن پلان کے تحت وفاقی ایپکس کمیٹی کی منظوری سے ”عزمِ استحکام“ کے وژن کے تحت جاری انسدادِ دہشت گردی مہم پوری رفتار سے جاری رہے گی۔