غیر ملکی سرمایہ کاری پر منافع کی بیرونِ ملک منتقلی میں سالانہ 11.5 فیصد کمی

رواں مالی سال 2026-27 کے پہلے ماہ (جولائی) پاکستان سے غیر ملکی سرمایہ کاری پر منافع اور ڈیویڈنڈز کی بیرونِ ملک منتقلی میں سالانہ بنیادوں پر 11.5 فیصد کمی ریکارڈ کی گئی۔

اسٹیٹ بینک آف پاکستان (ایس بی پی) کی جانب سے جاری کردہ اعدادوشمار کے مطابق جولائی 2026 میں غیر ملکی سرمایہ کاروں نے براہِ راست غیر ملکی سرمایہ کاری (ایف ڈی آئی) اور پورٹ فولیو سرمایہ کاری سے حاصل ہونے والے منافع اور ڈیویڈنڈز کی مد میں مجموعی طور پر 261.4 ملین ڈالر بیرونِ ملک منتقل کیے جبکہ جولائی 2025 میں یہ رقم 295 ملین ڈالر تھی، یوں 33.6 ملین ڈالر کی کمی ریکارڈ کی گئی۔

تاہم جون 2026 کے مقابلے میں جولائی میں منافع اور ڈیویڈنڈز کی بیرونِ ملک منتقلی نمایاں طور پر زیادہ رہی۔ جون میں غیر ملکی سرمایہ کاروں نے 151 ملین ڈالر بیرونِ ملک منتقل کیے تھے جبکہ جولائی میں یہ رقم 73 فیصد یا 110 ملین ڈالر اضافے کے ساتھ 261.4 ملین ڈالر ہوگئی۔

اعدادوشمار کے مطابق بیرونِ ملک منتقل کی گئی رقم کا بڑا حصہ براہِ راست غیر ملکی سرمایہ کاری (ایف ڈی آئی) سے متعلق تھا۔ تاہم ایف ڈی آئی سے منافع اور ڈیویڈنڈز کی منتقلی میں سالانہ بنیادوں پر تقریباً 14 فیصد کمی ہوئی اور جولائی 2026 میں یہ رقم کم ہوکر تقریباً 255 ملین ڈالر رہ گئی جو گزشتہ سال اسی ماہ 294.8 ملین ڈالر تھی، یوں 40 ملین ڈالر کی کمی ریکارڈ کی گئی۔

جولائی 2026 میں بیرونِ ملک منافع اور ڈیویڈنڈز کی منتقلی میں سب سے بڑا حصہ پاور سیکٹر کا رہا جہاں غیر ملکی سرمایہ کاروں نے 73 ملین ڈالر منتقل کیے جبکہ مالی شعبے سے 62 ملین ڈالر کا اخراج ہوا۔ کمیونیکیشن سیکٹر اور تمباکو و سگریٹ کی صنعت بھی سرفہرست پانچ شعبوں میں شامل رہے جہاں زیرِ جائزہ مدت کے دوران بالترتیب 24 ملین ڈالر اور 14.6 ملین ڈالر کی رقوم بیرونِ ملک منتقل کی گئیں۔