بھارت، کولکتہ کے ہوٹل میں آتشزدگی سے 9 افراد ہلاک

بھارت کے مشرقی شہر کولکتہ میں ایک ہوٹل میں بدھ کو آگ لگنے کے واقعے میں ایک بچے سمیت کم از کم 9 افراد ہلاک ہوگئے۔

ایک سینئر پولیس افسر نے رائٹرز کو بتایا کہ آگ مقامی وقت کے مطابق رات تقریباً ڈھائی بجے ہوٹل کی عمارت کی دوسری منزل پر لگی اور ایک گھنٹے کے اندر اس پر قابو پالیا گیا۔

افسر کے مطابق واقعے کے دوران تقریباً 30 افراد کو بحفاظت باہر نکال لیا گیا، جبکہ ممکنہ طور پر آگ بجلی کے شارٹ سرکٹ کے باعث لگی۔

انہوں نے مزید کہا کہ آگ لگنے کی اصل وجہ تاحال معلوم نہیں ہوسکی۔

مقامی میڈیا نے متعدد افراد کے زخمی ہونے کی اطلاع دی ہے، جبکہ کم از کم 6 زخمیوں کو اسپتال میں زیر علاج بتایا گیا ہے۔

خبر رساں ادارے اے این آئی نے محکمہ فائر بریگیڈ کے حوالے سے بتایا کہ ہلاک ہونے والوں میں بنگلہ دیشی شہری بھی شامل تھے، جو طبی علاج کے لیے کولکتہ آئے ہوئے تھے۔

این ڈی ٹی وی نے رپورٹ کیا کہ تمام 9 ہلاک افراد بنگلہ دیشی شہری تھے۔

تاہم رائٹرز سے بات کرنے والے سینئر پولیس افسر نے کہا کہ ہلاک ہونے والوں کی قومیتوں کی تاحال تصدیق نہیں ہوسکی۔

یہ ہوٹل وسطی کولکتہ کے ایک گنجان علاقے میں واقع ہے اور کم قیمت رہائش اور ریستورانوں کے لیے معروف ہے۔