بہار کے مندر میں بھگدڑ مچنے سے 6 افراد ہلاک

حکام نے پیر کو بتایا کہ بھارت کی مشرقی ریاست بہار کے ایک مندر میں پیش آنے والے واقعے میں کم از کم 6 افراد ہلاک اور کئی زخمی ہوگئے۔ پولیس کو شبہ ہے کہ یہ واقعہ بجلی کا کھمبا گرنے کے باعث پیش آیا، جس سے مندر میں موجود عبادت گزاروں میں خوف و ہراس پھیل گیا۔

حکام ریاست بہار کے ضلع لکھی سرائے میں اشوک دھام مندر میں ہندوؤں کے مقدس مہینے کے موقع پر موجود عقیدت مندوں کے درمیان پیش آنے والے واقعے کی وجوہات کی تحقیقات کررہے ہیں۔

سینئر پولیس افسر شیو کمار نے خبر رساں ادارے اے این آئی کو بتایا کہ وہاں بجلی کا کھمبا گر گیا اور لوگوں کو کرنٹ لگ گیا، جس کے نتیجے میں بھگدڑ جیسی صورتحال پیدا ہوگئی۔ انہوں نے کہا کہ ہم تمام معاملات کی تصدیق کے بعد ہی واقعے کی اصل وجہ بتا سکتے ہیں۔

ایک سینئر عہدیدار نے رائٹرز کو بتایا کہ واقعے میں کم از کم 5 افراد زخمی ہوئے۔

ٹیلی ویژن پر نشر ہونے والی تصاویر میں رشتہ داروں کو اسپتالوں کے باہر بڑی تعداد میں جمع دیکھا گیا، جبکہ امدادی کارکن زخمیوں کو اسٹریچرز پر اسپتال منتقل کررہے تھے۔

بھارت میں ہجوم سے متعلق حادثات کی ایک طویل تاریخ ہے۔ گزشتہ سال عظیم الشان مہا کمبھ میلے میں بھی 30 افراد ہلاک ہوگئے تھے، جب کروڑوں افراد مقدس پانی میں اشنان کے لیے جمع ہوئے تھے۔