قاسم پاشا کا شاندار کم بیک، صلاح کے لیے ٹرابزون اسپور کا پہلا میچ ڈرا پر ختم

محمد صلاح نے ٹرابزون اسپور کے لیے مسابقتی میچ میں ڈیبیو کیا۔ وہ ترک سپر لیگ کے افتتاحی میچ میں متبادل کھلاڑی کی حیثیت سے میدان میں اترے، تاہم قاسم پاشا نے ایک گول کے خسارے سے واپسی کرتے ہوئے میچ 1-1 سے برابر کردیا۔

ٹرابزون اسپور نے پہلے ہاف میں نوح ساویولو کے گول کی بدولت برتری حاصل کی، تاہم دوسرے ہاف میں قاسم پاشا کے ایڈرین بینیڈزیاک نے پنالٹی پر گول کرکے مقابلہ برابر کردیا۔

لیورپول میں 9 سیزن گزارنے کے بعد فری ٹرانسفر پر ٹرابزون اسپور سے منسلک ہونے والے صلاح کو برابری کے گول کے کچھ دیر بعد 58ویں منٹ میں میدان میں اتارا گیا۔

دائیں ونگ پر کھیلنے والے مصری فارورڈ نے مہمان ٹیم کے لیے گول کے کئی مواقع بنانے میں کردار ادا کیا، تاہم ٹرابزون اسپور فیصلہ کن گول کرنے میں ناکام رہا۔

کوچ فاتح تیکے نے کہا کہ یہ ہمارے لیے افسوسناک آغاز ہے، ہمیں میچ جیتنا چاہیے تھا لیکن کامیاب نہ ہوسکے۔ جمعرات کو یورپی مقابلے میں ہمارا سامنا ہم سے کہیں بہتر ٹیم سے ہوگا، جو انتہائی اہم میچ ہے۔

ٹرابزون اسپور گزشتہ سیزن سپر لیگ میں تیسرے نمبر پر رہا تھا اور ترک کپ بھی جیتا تھا۔ اب 20 اگست کو یوروپا لیگ کے پلے آف مرحلے میں اس کا مقابلہ ہنگری کے کلب فیرینک واروش سے ہوگا۔