پنجاب فوڈ اتھارٹی کی کارروائی، گندا اور زائد المیعاد گوشت ضائع

پنجاب فوڈ اتھارٹی نے سگیاں میں غیر قانونی مذبح خانے پر چھاپہ مار کر 700 کلو گرام بدبودار اور زائدالمیعاد گوشت برآمد کرلیا۔

ترجمان کے مطابق مذبح خانے کے مالک کے خلاف ایف آئی آر درج کرلی گئی جبکہ مضر صحت گوشت تلف کردیا گیا۔ انہوں نے بتایا کہ کارروائی ڈی جی پنجاب فوڈ اتھارٹی راجہ منصور احمد کی براہِ راست نگرانی میں کی گئی۔

انہوں نے کہا کہ میٹ سیفٹی ٹیم نے معائنے کے دوران گوشت کا رنگ نیلا پڑا ہوا پایا۔ تفصیلی جانچ میں گوشت متعدد خطرناک بیماریوں سے متاثر ہونے کا انکشاف ہوا۔ ڈی جی پنجاب فوڈ اتھارٹی کے مطابق گوشت کے ریشوں میں سیال مادے سے بھرے تھیلے اور کیڑے بھی پائے گئے، جس کے باعث یہ انسانی استعمال کے لیے انتہائی مضر تھا۔

راجہ منصور احمد نے بتایا کہ غیر قانونی ذبح اور گوشت ذخیرہ کرنے کی یہ سہولت رہائشی علاقے میں خفیہ طور پر قائم کی گئی تھی۔ ان کے مطابق پنجاب فوڈ اتھارٹی کی ٹیم کے پہنچتے ہی مالک موقع سے فرار ہوگیا۔

مذبح خانے کے پاس فوڈ کا کوئی مستند لائسنس یا لازمی ریکارڈ موجود نہیں تھا، جبکہ گوشت کو فوڈ سیفٹی کے ایس او پیز کی خلاف ورزی کرتے ہوئے براہِ راست فرش پر رکھا گیا تھا۔

کاپی رائٹ : بزنس ریکارڈر 2026