ناروے کے وزیر خارجہ 13 اور 14 اگست کو پاکستان کا دورہ کریں گے

ناروے کے وزیر خارجہ ایسپن بارتھ ایدے 13 اور 14 اگست کو نائب وزیراعظم و وزیر خارجہ سینیٹر محمد اسحاق ڈار کی دعوت پر پاکستان کا سرکاری دورہ کریں گے۔

دفتر خارجہ کے مطابق ایک دہائی میں ناروے کے کسی وزیر خارجہ کا یہ پہلا دورۂ پاکستان ہوگا۔دورے کے دوران اسحاق ڈار اور ایسپن بارتھ ایدے وفود کی سطح پر مذاکرات کریں گے، جن میں پاکستان اور ناروے کے تعلقات کے تمام پہلوؤں کا جائزہ لیا جائے گا۔

دونوں فریق دوطرفہ تعاون کو مزید وسعت دینے کے طریقوں پر تبادلہ خیال کریں گے، بالخصوص تجارت و سرمایہ کاری، موسمیاتی تبدیلی، قابلِ تجدید توانائی، تعلیم اور عوامی روابط کے شعبوں میں تعاون پر بات چیت ہوگی۔

اس کے علاوہ دونوں وزرائے خارجہ اہم علاقائی اور بین الاقوامی پیش رفت پر بھی تبادلہ خیال کریں گے۔یہ دورہ پاکستان اور ناروے کے درمیان اعلیٰ سطح کے روابط کے تسلسل کے دوران ہو رہا ہے۔ اس سلسلے میں مارچ اور اپریل 2026 میں دونوں وزرائے خارجہ کے درمیان ٹیلی فونک رابطے ہوئے، جبکہ ناروے کے ریاستی سیکریٹری اینڈریاس موٹسفیلٹ کراوک نے مئی میں اسلام آباد کا دورہ بھی کیا تھا۔

دفتر خارجہ کے مطابق یہ دورہ پاکستان اور ناروے کے درمیان دیرینہ اور دوستانہ تعلقات کو مزید مضبوط بنانے اور باہمی مفاد پر مبنی تعاون کے نئے شعبے تلاش کرنے کا موقع فراہم کرے گا۔