روپے کی قدر میں بہتری کا سلسلہ جاری، ڈالر 277.67 روپے پر بند

انٹربینک مارکیٹ میں منگل کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں مقامی کرنسی 3 پیسے کی بہتری سے 277.67 روپے پر بند ہوئی۔

یاد رہے کہ پیر کو مقامی کرنسی 277.70 روپے پر بند ہوئی تھی۔

دریں اثنا امریکی ڈالر بیشتر بڑی کرنسیوں کے مقابلے میں مستحکم رہا جبکہ مشرقِ وسطیٰ میں تنازع ختم کرنے کیلئے امریکا اور ایران کے درمیان معاہدے کی امیدیں مدھم ہونے کے باعث تیل کی قیمتیں ایک ہفتے کی بلند ترین سطح کے قریب رہیں۔ ایشیائی کاروباری اوقات میں یورو 1.1544 ڈالر جب کہ برطانوی پاؤنڈ 1.3509 ڈالر پر رہا۔

ین نے گزشتہ سیشن میں تیز گراوٹ کے بعد منگل کو قدرے استحکام حاصل کرلیا کیونکہ امریکا اور جاپان کی مشترکہ مارکیٹ مداخلت ین کو طویل مدتی تقویت دینے میں ناکام رہی جبکہ آسٹریلوی مرکزی بینک کے پالیسی فیصلے سے قبل آسٹریلوی ڈالر آٹھ ہفتوں کی بلند ترین سطح پر پہنچ گیا۔

ایشیائی کاروباری اوقات میں ین امریکی ڈالر کے مقابلے میں 158.93 کی سطح پر مضبوط ہوا تاہم گزشتہ ہفتے کے آخر میں امریکا اور جاپان کی جانب سے ین کی خریداری کے لیے کی گئی غیر معمولی مشترکہ مارکیٹ مداخلت کے بعد حاصل ہونے والی تین ماہ کی بلند ترین سطح 155.20 سے اب بھی خاصا دور رہا۔

دریں اثنا منگل کو تیل کی قیمتیں ایک ہفتے سے زائد کی بلند سطح کے قریب مستحکم رہیں۔