چین کا لینڈ سلائیڈنگ اور سیلاب کے نقصانات کم کرنے کے لیے اقدامات کا منصوبہ

چین موسمیاتی تبدیلیوں کے اثرات سے بہتر انداز میں نمٹنے کے لیے لینڈ سلائیڈنگ اور سیلاب کی روک تھام اور نقصانات کو کم کرنے کی صلاحیت مضبوط کرنے کا منصوبہ بنا رہا ہے۔

سرکاری نشریاتی ادارے سی سی ٹی وی کے مطابق، وزارت قدرتی وسائل اپنی توجہ ہلکی سطح کی لینڈ سلائیڈنگ کی روک تھام پر مرکوز کرے گی، جو بڑے پیمانے پر پائی جاتی ہے، جبکہ شدید بارشوں کے باعث آنے والے مٹی اور پتھروں کے تودوں سے پیدا ہونے والے خطرات کا بھی جائزہ لیا جائے گا۔

وزارت کے زیرِ توجہ علاقوں میں یاسیا ہائیڈرو پاور منصوبے کا تعمیراتی مقام، یان شان-تائی ہانگ پہاڑی سلسلہ، تھری گورجز ریزروائر علاقہ، وومینگ پہاڑ شامل ہیں۔

چین فضائی ریموٹ سینسنگ ٹیکنالوجی کے ذریعے ارضیاتی خطرات کی نشاندہی اور نگرانی کے نئے طریقے تلاش کرے گا۔

گزشتہ ماہ شمال مغربی صوبہ گانسو میں اچانک آنے والے سیلاب کے باعث ہونے والی لینڈ سلائیڈنگ سے 25 افراد ہلاک ہوئے، جبکہ جنوب مغربی علاقے چونگ چنگ میں پہاڑ گرنے کے نتیجے میں آنے والی لینڈ سلائیڈنگ سے 51 افراد جاں بحق ہوئے۔

چین کے مطابق گزشتہ سال ملک بھر میں 2 لاکھ 70 ہزار سے زائد ارضیاتی خطرات کے مقامات کی نشاندہی کی گئی، جو مجموعی طور پر تقریباً 1 کروڑ 10 لاکھ افراد کی سلامتی کے لیے خطرہ بن سکتے ہیں۔