جنگ بندی کی نئی کوششوں کے دوران غزہ میں اسرائیلی حملے، دو بچوں سمیت تین افراد شہید

غزہ میں اسرائیلی حملوں کے نتیجے میں دو بچوں سمیت کم از کم تین افراد شہید ہوگئے۔

طبی حکام کے مطابق جمعرات کو غزہ پٹی میں اسرائیلی حملوں کے نتیجے میں دو بچوں سمیت کم از کم تین افراد شہید ہوگئے جبکہ دوسری جانب ثالثوں نے امریکی ثالثی سے طے پانے والے غزہ امن منصوبے پر مکمل عملدرآمد کے لیے حماس کے رہنماؤں کے ساتھ نئے مذاکرات کیے۔

طبی حکام کے مطابق محصور علاقے کے جنوب خان یونس میں خیمہ بستی پر ہونے والے ایک اسرائیلی فضائی حملے میں ایک شخص اور 8 سالہ بچی شہید ہوگئی۔

وسطی غزہ پٹی کے بریج پناہ گزین کیمپ میں اسرائیلی فضائی حملے میں ایک گھر کو نشانہ بنایا گیا جس کے نتیجے میں 18 ماہ کا بچہ جاں بحق ہوگیا جبکہ کم از کم 8 افراد زخمی ہوئے۔

اسرائیلی فوج نے کہا کہ دونوں حملوں کا نشانہ حماس تھی۔

غزہ کے طبی حکام کے مطابق جنگ بندی نافذ ہونے کے بعد سے اسرائیلی حملوں میں شہید ہونے والے فلسطینیوں کی مجموعی تعداد 1,200 سے تجاوز کرگئی جن میں زیادہ تر عام شہری شامل ہیں۔

حماس عام طور پر اپنے نقصانات ظاہر نہیں کرتی۔

معاہدے نے مکمل جنگ کو تو روک دیا لیکن یومیہ بنیاد پر ہونے والے اسرائیلی حملوں کا خاتمہ نہیں کیا، اسی عرصے کے دوران غزہ میں عسکریت پسندوں کے ہاتھوں چار اسرائیلی فوجی بھی مارے جا چکے ہیں۔