ابھی مائیکرو فنانس بینک کا 3 ارب روپے کا آئی پی او لانے کا منصوبہ

بلومبرگ کی جمعرات کی رپورٹ کے مطابق پاکستان کا فن ٹیک گروپ ابھی رواں ماہ پاکستان اسٹاک ایکسچینج (پی ایس ایکس) میں اپنے مائیکرو لینڈر ادارے ابھی مائیکرو فنانس بینک لمیٹڈ کا آئی پی او لانے کی تیاری کررہا ہے۔

رپورٹ کے مطابق بینک تقریباً 14 فیصد نئے شیئرز جاری کرکے 2 سے 3 ارب روپے حاصل کرنے کا ہدف رکھتا ہے۔ قرضہ فراہم کرنے والے ادارے کے اسپانسر اور ڈائریکٹر عمیر انصاری نے میڈیا کو بتایا کہ بینک یہ رقم آئی پی او کے ذریعے جمع کرے گا۔

ابھی پرائیویٹ لمیٹڈ کے شریک بانی عمیر انصاری کا مقصد برازیل کے نیوبینک اور قازقستان کے کاسپی ڈاٹ کے زیڈ کی تیز رفتار ترقی کی طرز پر کامیابی حاصل کرنا ہے۔

ابھی مائیکرو فنانس بینک لمیٹڈ نے 2025 کا اختتام 1.019 ارب روپے کے بعد از ٹیکس منافع کے ساتھ کیا جو بینک کی تاریخ کا سب سے زیادہ منافع ہے۔ اس کے مقابلے میں 2024 میں بینک کو 1.754 ارب روپے کے بعد از ٹیکس نقصان کا سامنا تھا۔ یوں کئی سال کے نقصانات کے بعد صرف ایک سال میں بینک کی مالی کارکردگی میں نمایاں بہتری آئی اور منافع میں 2.773 ارب روپے کا غیر معمولی اضافہ ریکارڈ کیا گیا۔

بلومبرگ کے مطابق ابھی مائیکرو فنانس بینک آئی پی او سے حاصل ہونے والی رقم کو اپنے سرمائے کی بنیاد مضبوط بنانے کے لیے استعمال کرے گا۔

دریں اثنا عارف حبیب لمیٹڈ، ٹاپ لائن سیکیورٹیز لمیٹڈ اور گروتھ سیکیورٹیز کو اس پیشکش کے لیے مالیاتی مشیر (فنانشل ایڈوائزرز) کے طور پر مقرر کیا گیا ہے۔

عمیر انصاری نے کہا کہ بینک سونے کی ضمانت پر دیے جانے والے قرضوں کے شعبے میں مواقع دیکھ رہا ہے جہاں ابھی خاطر خواہ رسائی نہیں، اس حوالے سے انہوں نے پڑوسی ملک بھارت کی متھوٹ فنانس لمیٹڈ کی مثال دی۔

رپورٹ کے مطابق بینک سونے کو ڈیجیٹل ٹوکن میں تبدیل کرنے کے لیے لائسنس حاصل کرنے اور پاکستان و مشرقِ وسطیٰ کے صارفین کے درمیان کرپٹو ادائیگیوں کا نظام قائم کرنے کا بھی منصوبہ رکھتا ہے۔

پاکستان اسٹاک ایکسچینج (پی ایس ایکس) میں رواں سال آئی پی او مارکیٹ نے نمایاں بحالی کا مظاہرہ کیا ہے جس سے مارکیٹ میں مضبوط رفتار اور لسٹنگ کے بعد بہتر کارکردگی دیکھنے میں آئی ہے۔ 2026 کے پہلے نصف میں 9 کمپنیوں نے کامیابی کے ساتھ عوامی پیشکشوں کے ذریعے 20 ارب روپے سے زائد سرمایہ حاصل کیا۔

2026 میں آئی پی او مارکیٹ کی مضبوط رفتار بین الاقوامی مالیاتی فنڈ (آئی ایم ایف) پروگرام کے تحت بہتر ہوتی معاشی استحکام، مثبت مارکیٹ رجحانات، وافر لیکویڈیٹی اور سیاسی استحکام کے باعث پیدا ہونے والے اس رجحان کا تسلسل ہے، جو ایکویٹی سرمایہ کاری کی حوصلہ افزائی کررہے ہیں۔