ڈالر کے مقابلے میں روپے کی پیش قدمی برقرار

انٹربینک مارکیٹ میں پیر کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 277.86 روپے پر بند ہوا۔

یاد رہے کہ جمعہ کو مقامی کرنسی 277.87 روپے پر بند ہوئی تھی۔

دوسری جانب امریکا کی جانب سے ایران پر بمباری روکنے کے بعد پیر کو امریکی ڈالر دیگر بڑی کرنسیوں کے مقابلے میں کمزور پڑ گیا جس کے نتیجے میں خام تیل کی قیمتوں میں کمی آئی اور مرکزی بینکوں کے اجلاسوں سے بھرپور ہفتے سے قبل سرمایہ کاروں کے اعتماد میں اضافہ ہوا۔

جاپانی ین کے مقابلے میں امریکی ڈالر 0.2 فیصد کمی کے ساتھ 163.53 ین پر آ گیا جو 10 جولائی کے بعد اس کی ایک روزہ سب سے بڑی گراوٹ کی جانب اشارہ کرتا ہے۔

دوسری جانب یورو 0.3 فیصد اضافے کے ساتھ 1.1404 ڈالر تک پہنچ گیا جبکہ برطانوی پاؤنڈ 0.1 فیصد بڑھ کر 1.333 ڈالر ہو گیا۔

خام تیل کی قیمتوں میں نمایاں کمی دیکھی گئی، برینٹ کروڈ 6.5 فیصد گر کر 90.45 ڈالر فی بیرل پر آ گیا، جس کے بعد امریکی فوج نے دو ہفتوں سے جاری حملے عارضی طور پر روک دیے۔

اتوار کو ایک سینئر ایرانی عہدیدار نے رائٹرز کو بتایا کہ ایران بھی اس وقت تک اپنے حملے معطل رکھے گا جب تک امریکا ایسا ہی کرتا رہے گا۔ یہ پیش رفت پاکستان میں تعطل کا شکار سفارتی کوششوں کو دوبارہ شروع کرنے کے لیے چین کی قیادت میں کی جانے والی سفارتی پیش رفت کے بعد سامنے آئی، جس کا مقصد جنگ کا خاتمہ تھا۔

دوسری جانب ڈالر انڈیکس 101.27 پر تقریباً مستحکم رہا جبکہ سرمایہ کاروں کی نظریں 28 اور 29 جولائی کو ہونے والے امریکی فیڈرل ریزرو کے مانیٹری پالیسی اجلاس پر مرکوز ہیں۔