چین میں سیلابی موسم عروج پر، شمالی علاقوں میں غیر معمولی بارشوں کا الرٹ جاری

چین میں ماہرین موسمیات نے خبردار کیا ہے کہ ملک سیلابی موسم کے انتہائی اہم مرحلے میں داخل ہو چکا ہے، جبکہ جولائی کے آخری ہفتے سے اگست کے اوائل تک شدید بارشوں کی شدت اور تعداد میں نمایاں اضافہ متوقع ہے۔

قومی موسمیاتی مرکز کے مطابق شمالی چین، مشرقی اندرونی منگولیا اور شمال مشرقی علاقوں میں معمول سے زیادہ بارشیں ہوں گی، جبکہ بیجنگ، تیانجن اور ہیبی کے کئی علاقوں میں بارشیں معمول سے 20 سے 50 فیصد زیادہ رہنے کا امکان ہے۔

ماہرین کا کہنا ہے کہ بڑھتے ہوئے درجہ حرارت کے باعث بارشوں کا سلسلہ مغرب اور شمال کی جانب منتقل ہو رہا ہے، جس سے مرطوب علاقوں کا دائرہ وسیع ہو رہا ہے اور سیلاب، لینڈ سلائیڈنگ اور شہری علاقوں میں پانی جمع ہونے جیسے ثانوی خطرات بڑھ رہے ہیں۔

کینیڈا کی یونیورسٹی آف وکٹوریہ کے پروفیسر ژانگ شوئبن نے کہا کہ موسمیاتی تبدیلی اب چین کے لیے مستقبل کا نہیں بلکہ موجودہ دور کا مسئلہ بن چکی ہے، اس لیے صرف روک تھام نہیں بلکہ موسمیاتی تبدیلی سے ہم آہنگی کی حکمت عملی بھی ضروری ہے۔

حالیہ ہفتوں میں چین کے مختلف علاقوں میں موسلادھار بارشیں ریکارڈ کی گئی ہیں۔ گزشتہ جمعہ جنوب مغربی شہر چونگ چنگ کے ضلع پنگ شوئی میں لینڈ سلائیڈنگ کے نتیجے میں کم از کم آٹھ افراد ہلاک ہوگئے، جبکہ 34 افراد اب بھی لاپتا ہیں جن کی تلاش جاری ہے۔

موسمیاتی مرکز نے خبردار کیا ہے کہ بعض علاقوں میں غیر معمولی بارشیں اچانک سیلاب، شہری آبادیوں میں پانی جمع ہونے اور لینڈ سلائیڈنگ کا سبب بن سکتی ہیں، لہٰذا متعلقہ اداروں کو ہائی الرٹ رہنے کی ہدایت کی گئی ہے۔