ایچ بی ایل نے یورومنی کا پاکستان کا بہترین بینک 2026 کا ایوارڈ جیت لیا

یورومنی ایوارڈز فار ایکسی لینس 2026 نے حبیب بینک لمیٹڈ (ایچ بی ایل) کو پاکستان کے بہترین بینک کے اعزاز سے نوازا ہے۔

بینک نے بہترین ریٹیل بینک، پائیدار مالیات کیلئے بہترین بینک، کیپٹل مارکیٹس ایڈوائزری کے شعبے میں بہترین بینک اور ادغام و انضمام کے لیے پاکستان کا بہترین سرمایہ کاری بینک کے اعزازات بھی اپنے نام کیے ہیں۔

یورومنی کے مطابق حبیب بینک لمیٹڈ کو 2026 کے لیے پاکستان کا بہترین بینک قرار دیا گیا ہے جو ریٹیل، کارپوریٹ، سرمایہ کاری (انویسٹمنٹ) اور نجی بینکاری (پرائیویٹ بینکنگ) کے شعبوں میں اس کی مارکیٹ قیادت، وسیع پیمانے پر موجودگی اور مسلسل بہترین کارکردگی کا مظہر ہے۔ اس کامیابی کی بنیاد مضبوط مالیاتی کارکردگی اور ملک بھر میں اس کے وسیع نیٹ ورک پر ہے۔

ایچ بی ایل کے صدر اور چیف ایگزیکٹو آفیسر محمد ناصر سلیم نے کہا کہ یہ اعزازات اس بات کا ثبوت ہیں کہ ایچ بی ایل ایک ایسی تنظیم میں تبدیل ہوچکا ہے جو اپنے صارفین کو اولین ترجیح دیتے ہوئے انہیں بے مثال خدمات اور قدر فراہم کرتی ہے۔ پاکستان کا بہترین بینک قرار دیا جانا ہمارے لاکھوں صارفین کے ایچ بی ایل پر مسلسل اعتماد اور بھروسے کا اعتراف ہے۔

کاپی رائٹ بزنس ریکارڈر 2026