پی ایس او نے تیل چوری کی بڑی کوشش ناکام بنا دی

پاکستان اسٹیٹ آئل (پی ایس او) نے قانون نافذ کرنے والے اداروں کے ساتھ قریبی تعاون سے 15 اور 16 جولائی 2026 کی درمیانی شب ایک کامیاب کارروائی کرتے ہوئے سہالہ–اے آر ایل پائپ لائن سے تیل چوری کرنے والے ایک منظم گروہ کو رنگے ہاتھوں گرفتار کر لیا۔

یہ کارروائی رات 11 بج کر 45 منٹ پر پائپ لائن میں اچانک دباؤ کم ہونے کی نشاندہی کے بعد شروع کی گئی۔ کہوٹہ روڈ پر واقع ایک مشتبہ مقام کی پہلے سے نگرانی اور خفیہ اطلاعات کی بنیاد پر پی ایس او نے فوری طور پر قانون نافذ کرنے والے اداروں کو آگاہ کیا۔

مشترکہ کارروائی کے دوران سیکیورٹی ٹیموں نے فوری طور پر موقع پر پہنچ کر رات تقریباً 2 بج کر 15 منٹ پر ملزمان کو پائپ لائن سے غیرقانونی طور پر پیٹرولیم مصنوعات نکالتے ہوئے رنگے ہاتھوں گرفتار کر لیا۔

برآمد ہونے والے سامان میں تیل کی چوری میں استعمال ہونے والی دو گاڑیاں شہزور اور ہنڈائی ٹرک قبضے میں لے لی گئیں، گاڑیوں سے تقریباً 800 لیٹر ہائی اسپیڈ ڈیزل (ایچ ایس ڈی) برآمد کیا گیا،ذخیرہ کرنے والے ٹینکوں سے مزید تقریباً 1,000 لیٹر ہائی اسپیڈ ڈیزل برآمد ہوا،ڈرموں اور 20 اور 50 لیٹر کے کینوں میں موجود کم از کم 200 لیٹر ہائی اسپیڈ ڈیزل بھی قبضے میں لیا گیا،پائپ لائن سے غیرقانونی طور پر تیل نکالنے کے لیے استعمال ہونے والا تمام متعلقہ سامان بھی ضبط کر لیا گیا۔

گرفتار ملزمان، ضبط شدہ گاڑیاں، برآمد شدہ ڈیزل اور دیگر سامان مزید تفتیش اور قانونی کارروائی کے لیے سہالہ پولیس کے حوالے کر دیا گیا ہے۔

پی ایس او نے اپنے بیان میں کہا کہ یہ کامیاب کارروائی ایندھن کی چوری کے خلاف ادارے کی زیرو ٹالرنس پالیسی اور قومی توانائی کے بنیادی ڈھانچے کے تحفظ کے عزم کی عکاس ہے۔ بیان کے مطابق یہ کامیابی حقیقی وقت میں نگرانی، مؤثر خفیہ معلومات اور قانون نافذ کرنے والے اداروں کی بروقت کارروائی کے باعث ممکن ہوئی۔

کاپی رائٹ بزنس ریکارڈر، 2026