نیوزی لینڈ میں پہلی بار ایچ 5 این 1 برڈ فلو کی تصدیق، نایاب پرندوں کی ویکسینیشن شروع

نیوزی لینڈ میں پہلی مرتبہ مہلک ایچ 5 این 1 برڈ فلو وائرس کا کیس سامنے آ گیا ہے، جس کے بعد حکام نے جنگلی حیات کے تحفظ اور وائرس کے پھیلاؤ کو روکنے کے لیے نگرانی مزید سخت کر دی ہے۔

بائیو سکیورٹی کے وزیر اینڈریو ہوگارڈ نے بدھ کو بتایا کہ دارالحکومت ویلنگٹن کے قریب ساحل سے ملنے والے ایک ہجرت کرنے والے براؤن سکوا سمندری پرندے میں ایچ 5 این 1 وائرس کی تصدیق ہوئی ہے۔ گزشتہ ماہ آسٹریلیا میں بھی اس وائرس کی موجودگی سامنے آئی تھی۔

وزیر نے کہا کہ فی الحال نیوزی لینڈ میں جنگلی پرندوں کے درمیان وائرس کے وسیع پیمانے پر پھیلنے یا بڑی تعداد میں ہلاکتوں کے شواہد نہیں ملے، جبکہ پولٹری فارموں میں بھی وائرس کی کوئی تصدیق نہیں ہوئی۔

حکام کے مطابق نیوزی لینڈ پہلے ہی ایچ 5 این 1 وائرس کی ممکنہ آمد کی تیاری کر رہا تھا اور پولٹری صنعت کے ساتھ مل کر بائیو سکیورٹی اور ہنگامی منصوبے تیار کیے گئے تھے۔

ماہرین کا کہنا ہے کہ نیوزی لینڈ کے مقامی پرندے اس وائرس کے لیے غیرمعمولی طور پر حساس ہیں کیونکہ وہ لاکھوں برس تک زمینی شکاری جانوروں سے الگ تھلگ ماحول میں ارتقا پذیر ہوئے، جس کے باعث کئی اقسام اڑنے سے محروم یا زمین پر گھونسلے بنانے والی ہیں۔

حکام نے ملک کی پانچ انتہائی نایاب نسلوں کے تقریباً 300 افزائشی پرندوں کے لیے ویکسینیشن پروگرام بھی شروع کر دیا ہے۔

میسی یونیورسٹی کے جنگلی حیات کے ماہر پروفیسر بریٹ گارٹریل نے خبردار کیا کہ اگر وائرس تیزی سے پھیلا تو نیوزی لینڈ کے بعض انتہائی نایاب پرندوں کی نسل معدوم ہونے کے خطرے سے دوچار ہو سکتی ہے۔