بینک الفلاح نے 20 ارب روپے کے ٹئیر 2 ٹرم فنانس سرٹیفکیٹ جاری کردیے

بینک الفلاح نے کامیابی کے ساتھ 20 ارب روپے کا ٹرپل اے ریٹنگ یافتہ ٹئیر 2 ٹرم فنانس سرٹیفکیٹ (ٹی ایف سی ) جاری کیا ہے جو پاکستان کی بینکاری صنعت میں اپنی نوعیت کا سب سے بڑا ٹی ایف سی اجرا ہے۔

یہ بینک الفلاح کا پہلا AAA ریٹنگ یافتہ ٹی ایف سی بھی ہے۔ اس اجرا کو اسٹیٹ بینک آف پاکستان کی منظوری حاصل تھی اور اسے ادارہ جاتی سرمایہ کاروں کی جانب سے بھرپور پذیرائی ملی جو بینک الفلاح کی مالی مضبوطی، مؤثر طرزِ حکمرانی اور طویل المدتی ترقیاتی حکمتِ عملی پر سرمایہ کاروں کے اعتماد کا مظہر ہے۔

باسل III ریگولیٹری فریم ورک کے تحت جاری کیا گیا یہ ٹئیر 2 اجرا بینک کی ترقیاتی حکمتِ عملی کا ایک اہم حصہ ہے اور اس کے گروتھ کیپیٹل کو مزید مستحکم کرے گا، جس سے بینک کو بالخصوص چھوٹے اور درمیانے درجے کے کاروبار (ایس ایم ایز)، ماحولیاتی، سماجی اور گورننس (ای ایس جی) اقدامات، اور صارفین کے شعبے (کنزیومر سیگمنٹ) میں اپنی جارحانہ ترقی کی حکمتِ عملی کو مزید آگے بڑھانے میں مدد ملے گی۔

یہ تاریخی لین دین بینک کی بنیادی منافع بخشی میں اضافہ کرے گا اور طویل المدتی بنیادوں پر حصص یافتگان کے منافع میں بہتری لانے میں معاون ثابت ہوگا۔یہ کامیاب اجرا بینک الفلاح کی مضبوط مالی کارکردگی اور متوازن بیلنس شیٹ مینجمنٹ کی عکاسی کرتا ہے۔

31 دسمبر 2025 تک بینک نے 28.34 ارب روپے بعد از ٹیکس منافع، 2.49 کھرب روپے کے مجموعی ڈپازٹس، 1.15 کھرب روپے کے مجموعی قرضہ جات رپورٹ کیے، جبکہ اس کا سرمایہ جاتی کفایت کا تناسب 15.87 فیصد رہا، جو ریگولیٹری کم از کم حد سے نمایاں طور پر زیادہ ہے۔

اس کامیاب اجرا پر اظہارِ خیال کرتے ہوئے گروپ ہیڈ اسٹریٹجی ٹرانسفارمیشن، کسٹمر ایکسپیرینس اور وی سی انویسٹمنٹس عاصم واجد جواد نے کہا کہ یہ لین دین بینک الفلاح کے کیپٹل مارکیٹس کے سفر میں ایک اہم سنگِ میل ہے۔

بینک الفلاح کے گروپ ہیڈ گلوبل مارکیٹس اینڈ ٹریژری پرویز شہباز خان نے کہا کہ اس اہم ٹرانزیکشن کا کامیاب نفاذ بینک الفلاح کے کریڈٹ معیار اور مالی لچک پر سرمایہ کاروں کے گہرے اعتماد کو ظاہر کرتا ہے۔

کاپی رائٹ بزنس ریکارڈر 2026