ارجنٹائن کی ٹیم کو ناقابلِ شکست جذبے سے یاد رکھا جائے، کوچ لیونل اسکالونی

ارجنٹینا کے کوچ لیونل اسکالونی نے کہا ہے کہ وہ چاہتے ہیں کہ ان کی ٹیم کو ایسی ٹیم کے طور پر یاد رکھا جائے جس نے کبھی ہار نہیں مانی۔

واضح رہے کہ ارجنٹائن کی ٹیم ہفتہ کو ورلڈ کپ کے کوارٹر فائنل میں سوئٹزرلینڈ کے خلاف میچ کی تیاری کررہی ہے۔

دفاعی چیمپئنز نے ٹورنامنٹ کے گروپ مرحلے کو تو آسانی سے عبور کرلیا لیکن ناک آؤٹ راؤنڈز میں کیپ ورڈی اور مصر نے انہیں سخت مشکل میں ڈال دیا تھا۔

جنوبی امریکی ٹیم اب تک ورلڈ کپ کے مسلسل 11 میچوں میں ناقابلِ شکست رہی ہے اور اس کی کوشش ہے کہ وہ 1962 میں برازیل کے بعد مسلسل دو ورلڈ کپ جیتنے والی پہلی ٹیم بن جائے۔

تاہم اب اسے کینساس سٹی میں ایک محنتی، منظم اور بہترین حکمتِ عملی سے کھیلنے والی سوئٹزرلینڈ کی ٹیم کے خلاف سخت امتحان کا سامنا ہوگا۔

ارجنٹائن کے کوچ اسکالونی نے جمعہ کو ایرو ہیڈ اسٹیڈیم میں پری میچ پریس کانفرنس کے دوران کہا کہ ٹیم کی حمایت دراصل جذبے کا نام ہے۔

انہوں نے کہا کہ میں چاہتا ہوں کہ اس ٹیم کو ایک ایسی ٹیم کے طور پر یاد رکھا جائے جس نے کبھی ہار نہیں مانی۔

48 سالہ کوچ نے بتایا کہ وہ ایک نوجوان مداح کو ٹیم کے لیے اپنی حمایت کا اظہار کرتے دیکھ کر جذباتی ہوگئے تھے۔