جنوبی کوریا کی ایس کے ہائنکس کا اے آئی بوم سے فائدہ اٹھانے کیلئے 28 ارب ڈالر کی امریکی لسٹنگ کا اعلان

جنوبی کوریا کی معروف چپ ساز کمپنی ایس کے ہائینکس پیر کے روز امریکی اسٹاک مارکیٹ میں اپنی لسٹنگ شروع کرے گی، جس کے ذریعے تقریباً 28 ارب ڈالر اکٹھے کیے جائیں گے۔ یہ پیش رفت کمپنی کی جانب سے عالمی سطح پر بڑھتی ہوئی آرٹیفیشل انٹیلی جنس (اے آئی) کی مانگ سے فائدہ اٹھانے کی حکمت عملی کا حصہ ہے۔

ریگولیٹری فائلنگز کے مطابق کمپنی 17.79 ملین نئے شیئرز امریکی ڈیپازٹری رسید (اے ڈی آر) کی صورت میں نیسڈیک پر پیش کرے گی۔ اس لسٹنگ میں 10 اے ڈی آرز ایک عام شیئر کے برابر ہوں گے، جبکہ قیمت کا تعین کمپنی کے سیول میں ٹریڈنگ ریٹ کی بنیاد پر کیا جائے گا۔

ایس کے ہائینکس کے شیئرز پیر کو 4.2 فیصد کمی کا شکار رہے، تاہم رواں سال اب تک کمپنی کے حصص میں تقریباً 273 فیصد اضافہ ریکارڈ کیا جا چکا ہے، جس کی بڑی وجہ عالمی سطح پر اے آئی چپس کی بڑھتی ہوئی طلب ہے۔ اسی دوران جنوبی کوریا کا کوسپی انڈیکس بھی 2.2 فیصد نیچے آیا۔

گزشتہ ہفتے جنوبی کوریا نے سیمی کنڈکٹرز اور مصنوعی ذہانت پر مبنی ایک بڑا صنعتی منصوبہ اعلان کیا تھا، جس کے تحت ملک کے جنوب مغربی حصے میں 576 ارب ڈالر کی چپ سرمایہ کاری کا پروگرام شروع کیا جائے گا۔ حکومت کے مطابق اس منصوبے کی قیادت ایس کے ہائینکس اور سام سنگ الیکٹرانکس کریں گے۔

صدر لی جے میونگ نے حکام کو ہدایت دی ہے کہ سیمی کنڈکٹر اور اے آئی منصوبوں پر فوری عملدرآمد یقینی بنایا جائے اور اجازت ناموں، زمین کے حصول اور بجلی و پانی کی فراہمی میں تاخیر کو ختم کیا جائے۔

کمپنی کی نیویارک لسٹنگ کی حتمی قیمت جمعرات کو طے ہوگی جبکہ جمعہ سے باقاعدہ ٹریڈنگ شروع ہونے کی توقع ہے۔ ماہرین کے مطابق یہ ڈیل عالمی سطح پر بڑے شیئر سیلز میں نمایاں حیثیت رکھتی ہے اور اے آئی انڈسٹری میں سرمایہ کاروں کی دلچسپی کو مزید بڑھا سکتی ہے۔