بین اسٹوکس کے بعد انگلش آل راؤنڈر کی جگہ لینے کے لیے سیم کرن پرعزم

سیم کرن نے کہا ہے کہ وہ بین اسٹوکس کی ریٹائرمنٹ کے بعد خالی ہونے والی جگہ پُر کرنے کے موقع کا خیرمقدم کریں گے کیونکہ انگلینڈ ٹیسٹ کپتان کی سبکدوشی کے بعد ایک معیاری فاسٹ بولنگ آل راؤنڈر کے متبادل کی تلاش میں ہے۔

جب ان سے پوچھا گیا کہ کیا وہ اس موقع کا خیرمقدم کریں گے تو سیم کرن نے جمعہ کو بی بی سی اسپورٹ سے گفتگو میں جواب دیاجی ہاں، بالکل۔

لیکن میری پوری توجہ اپنی بہترین کارکردگی دکھانے پر ہے۔ جب بھی وہ وقت آئے گا اور یہ فیصلہ کیا جائے گا کہ اسٹوکسی کی جگہ کون لے گا تو انگلینڈ کی نمائندگی کرنا میرے لیے اعزاز کی بات ہوگی۔ میں ایک مسابقتی کھلاڑی ہوں اور ہمیشہ ٹیم میں اپنی جگہ بنانے کے لیے تیار رہتا ہوں۔

انہوں نے کہا کہ جب بھی میرے ہاتھ میں گیند یا بلّا ہوتا ہے، میری پوری کوشش یہی ہوتی ہے کہ اپنی بہترین کارکردگی پیش کروں۔

کرن نے اگست 2021 میں بھارت کے خلاف انگلینڈ کی ہوم سیریز کے بعد سے ٹیسٹ کرکٹ نہیں کھیلی اور تب سے وہ صرف وائٹ بال فارمیٹس میں ہی حصہ لے رہے ہیں۔

28 سالہ کھلاڑی بھارت کے خلاف انگلینڈ کی جاری پانچ میچوں کی ٹی ٹوئنٹی سیریز کا حصہ ہیں اور انہیں اس ماہ کے آخر میں ہونے والی تین ایک روزہ بین الاقوامی میچوں کی سیریز کے لیے بھی اسکواڈ میں شامل کیا گیا ہے۔

انگلینڈ ہفتے کو اولڈ ٹریفورڈ میں دوسرے ٹی ٹوئنٹی میچ میں بھارت کا سامنا کرے گا۔