سمیڈا اور ایل سی سی آئی کے درمیان چھوٹے اور درمیانے درجے کے کاروباروں کی ترقی کے اقدامات پر بات چیت

اسمال اینڈ میڈیم انٹرپرائزز ڈویلپمنٹ اتھارٹی (سمیڈا) اور لاہور چیمبر آف کامرس اینڈ انڈسٹری (ایل سی سی آئی) نے عالمی یومِ ایم ایس ایم ای 2026 کے موقع پر مشترکہ تقریب کا انعقاد کیا۔ تقریب میں کاروباری افراد، تجارتی تنظیموں، خواتین و نوجوان انٹرپرینیورز اور مالیاتی اداروں کے نمائندوں نے شرکت کی۔

اس دن کا مقصد ملکی معاشی ترقی، روزگار کی فراہمی اور جدت طرازی میں مائیکرو، چھوٹے اور درمیانے درجے کے اداروں (ایم ایس ایم ایز) کے کردار کو سراہنا تھا۔سمیڈا کی جی ایم صالحہ سعید نے ادارے کی خدمات پر روشنی ڈالی، جبکہ صدر ایل سی سی آئی فہیم الرحمن سہگل نے معیشت کی مضبوطی کے لیے انٹرپرینیور شپ کی اہمیت پر زور دیا۔ سمیڈا کے ریجنل چیف محمد جاوید افضل نے تین سالہ بزنس پلان (2025-2028) کا خاکہ پیش کرتے ہوئے کاروبار کی ترقی، مالیاتی سہولتوں اور صلاحیتوں میں اضافے کے لیے جاری اقدامات کا ذکر کیا۔

سمیڈا بورڈ کے ارکان عثمان خان، آسیہ سائل، اور ایل سی سی آئی کے کنوینر شیخ سجاد افضل نے زور دیا کہ ایم ایس ایم ای ملکی معیشت کی ریڑھ کی ہڈی ہیں، جن کی ترقی کے لیے نجی و سرکاری شعبوں میں قریبی تعاون اور کاروباری آسانی کا ہونا ناگزیر ہے جبکہ ویمن چیمبر کی صدر فلاحات عمران نے بالخصوص خواتین کاروباریوں کے لیے سمیڈا کی کوششوں کی تعریف کی۔