پی ایل آئی سی کی رواں مالی سال نمایاں پیشرفت

پنجاب لائف انشورنس کمپنی (پی ایل آئی سی) نے مالی سال 2025 26 کے دوران نمایاں پیش رفت کی جس کے تحت یہ ادارہ ایک پالیسی اقدام سے ترقی کرتے ہوئے فعال پبلک شعبے کی انشورنس کمپنی میں تبدیل ہوگیا ہے۔

ریگولیٹری محاذ پر پی ایل آئی سی نے ایس ای سی پی سے لائف انشورنس کا لائسنس حاصل کرلیا ہے جس کے ساتھ ہی یہ پاکستان کی 13ویں لائف انشورنس کمپنی بن گئی ہے جو کہ ریگولیٹری امور میں مضبوط تیاری اور ایک پیشہ ورانہ طور پر چلنے والی صوبائی انشورنس کمپنی کے قیام کے لیے حکومت کے عزم کی عکاسی کرتی ہے۔

لائسنس کے حصول کے بعد پی ایل آئی سی نے آپریشنل ڈھانچہ سازی اور ترجیحات کا تعین شروع کردیا ہے۔ اپنے ابتدائی مرحلے میں یہ کلیدی پبلک ہیلتھ پروگراموں کے انتظام کو سنبھالنے کے لیے تیار ہے جن میں وزیرِاعلیٰ کے صحت کے اقدامات اور صحت سہولت پروگرام شامل ہیں جس کا مقصد کارکردگی، نگرانی اور خدمات کی فراہمی کو بہتر بنانا ہے۔ اسی کے ساتھ سرکاری ملازمین کو انشورنس کوریج فراہم کرنے کی کوششیں بھی جاری ہیں تاکہ سماجی تحفظ کو مزید مضبوط بنایا جا سکے۔

بجٹ دستاویز کے مطابق ایک مرحلہ وار روڈ میپ طے کیا گیا ہے جس کے تحت مالی سال 2026-27 کی تیسری سہ ماہی میں وزیرِ اعلیٰ کے صحت کے اقدامات کا انتظام سنبھالنے کا منصوبہ ہے، جس کے بعد سرکاری اور نجی شعبے کے ملازمین کے لیے لائف اور ہیلتھ انشورنس مصنوعات متعارف کرائی جائیں گی۔ بینک آف پنجاب کے ذریعے بنک اشورنس کا منصوبہ مالی سال 2026-27 کی چوتھی سہ ماہی کے لیے ہے جس کا مقصد بینک کے برانچ نیٹ ورک کے ذریعے رسائی کو وسیع کرنا ہے۔ کمپنی شریعہ کمپلائنٹ تکافل مصنوعات کے لیے بھی منظوری حاصل کرنے کی کوشش کر رہی ہے۔

کاپی رائٹ بزنس ریکارڈر 2026