وحدت پولٹری کا آئی پی او کی آمدنی سے 1 لاکھ مرغیاں خریدنے کا فیصلہ

وحدت پولٹری فارم لمیٹڈ نے اپنے حالیہ انیشل پبلک آفرنگ (آئی پی او) سے حاصل ہونے والی رقم کے ذریعے 1 لاکھ اضافی لیئر پرندوں (انڈے دینے والی مرغیوں) کی پرورش کا باقاعدہ آغاز کر دیا ہے۔

کمپنی کی جانب سے جاری کردہ نوٹس کے مطابق وحدت پولٹری فارم لمیٹڈ اس بات سے مطلع کرتی ہے کہ کمپنی نے اپنے توسیعی منصوبے کے تحت 1 لاکھ اضافی لیئر پرندوں کی پرورش شروع کر دی ہے، جس کی فنڈنگ کمپنی کے حالیہ آئی پی او سے حاصل ہونے والی آمدنی سے کی گئی ہے۔

نوٹس میں مزید بتایا گیا ہے کہ پرورش کا عمل باقاعدہ طور پر شروع ہو چکا ہے اور توقع ہے کہ یہ فلاک (پرندوں کا غول) منصوبہ بند پروڈکشن سائیکل کے مطابق انڈے دینے کی صلاحیت حاصل کر لے گا۔ اس فلاک سے انڈوں کی تجارتی سطح پر پیداوار نومبر 2026 میں شروع ہونے کی امید ہے۔

یاد رہے کہ گزشتہ ماہ وحدت پولٹری فارم لمیٹڈ کو پاکستان اسٹاک ایکسچینج (پی ایس ایکس) کے مین بورڈ پر باقاعدہ طور پر لسٹ کیا گیا تھا۔ کمپنی نے ایک کامیاب آئی پی او کے ذریعے 95.6 کروڑ (956 ملین) روپے اکٹھے کیے تھے، جس میں ادارہ جاتی اور ریٹیل، دونوں طرح کے سرمایہ کاروں کی جانب سے بھرپور دلچسپی دیکھی گئی تھی۔

کمپنی کے آئی پی او کو سرمایہ کاروں کی زبردست مانگ کا سامنا تھا، جس کے باعث سٹرائیک پرائس (اسٹرائیک قیمت) 18 روپے فی شیئر طے پائی، جو کہ 12 روپے کی فلور پرائس سے 50 فیصد زائد ہے۔ بک بلڈنگ کا حصہ 5.2 گنا جبکہ ریٹیل کا حصہ 1.2 گنا اوور سبسکرائب ہوا تھا۔

وحدت پولٹری فارم کے آئی پی او پراسپیکٹس کے مطابق شیئرز کی فروخت سے حاصل ہونے والی رقم کو ایک نئے پاسچرائزیشن پلانٹ کے قیام، اضافی پرندوں کی پرورش اور کوالٹی اشورڈ پروکیورمنٹ ماڈل کے لیے ورکنگ کیپیٹل میں اِضافے کے لیے استعمال کیا جانا ہے۔

پراسپیکٹس میں واضح کیا گیا تھا کہ اس ایشو کا بنیادی مقصد کیپیٹل ایفیشنٹ ماڈل کے ذریعے پیداواری صلاحیت میں توسیع، ورکنگ کیپیٹل کی بڑھتی ہوئی ضروریات کو پورا کرنا اور انڈوں کی پاسچرائزڈ پروڈکشن کے نئے یونٹ کے ذریعے ہائی ویلیو سیگمنٹس میں تنوع لانا ہے۔