ڈالر کے مقابلے روپے کی قدر میں معمولی اضافہ

انٹربینک مارکیٹ میں پیر کو ڈالر کے مقابلے روپے کی قدر میں معمولی اضافہ ریکارڈ کیا گیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی معمولی بہتری سے 278.40 روپے پر بند ہوا۔

یاد رہے کہ جمعہ کو مقامی کرنسی 278.41 روپے پر بند ہوئی تھی۔

دوسری جانب پیر کو امریکی ڈالر تقریباً دو ماہ کی بلند ترین سطح کے قریب پہنچ گیا جب امریکا میں ملازمتوں کے غیرمعمولی مضبوط اعداد و شمار کے بعد تاجروں نے اس سال فیڈرل ریزرو کی جانب سے شرح سود میں اضافے کی توقعات بڑھا دیں جبکہ جاپانی ین مزید مداخلتی زون کے قریب پہنچ گئی۔

کرنسی مارکیٹ میں نقل و حرکت مجموعی مارکیٹ کے مقابلے میں محدود رہی جہاں ٹیکنالوجی شیئرز میں شدید فروخت کے باعث ایشیائی مارکیٹوں میں مندی کی لہر دوڑ گئی۔ دوسری جانب ڈالر نے اپنی مضبوط برتری برقرار رکھی جو اس رپورٹ کے بعد سامنے آئی جس میں بتایا گیا کہ گزشتہ ماہ نان فارم پے رولز میں ایک لاکھ 72 ہزار ملازمتوں کا اضافہ ہوا جو اندازوں سے کہیں زیادہ تھا۔

امریکی ڈالر کے مقابلے میں یورو گر کر دو ماہ کی کم ترین سطح 1.1507 ڈالر پر آ گیا، جبکہ برطانوی پاؤنڈ بھی تین ہفتوں کی کم ترین سطح 1.33165 ڈالر پر دباؤ کا شکار رہا۔

اسی طرح آسٹریلین اور نیوزی لینڈ ڈالرز بھی گر کر بالترتیب 0.7016 اور 0.5779 پر پہنچ گئے، جو ان کی دو ماہ کی کم ترین سطح ہے۔