آبنائے ہرمز کھلی رہے گی مگر ٹرانزٹ فیس عائد ہوگی، ایران

ایران کے روس میں تعینات سفیر کاظم جلالی نے کہا ہے کہ آبنائے ہرمز کھلی رہے گی تاہم اس کے لیے ایران اور عمان کی جانب سے نئے قواعد و ضوابط طے کیے جائیں گے، جن میں ممکنہ طور پر ٹرانزٹ فیس بھی شامل ہو سکتی ہے۔

روسی اخبار ایزویستیا کو دیے گئے انٹرویو میں انہوں نے کہا کہ ایران اور عمان اس اہم آبی گزرگاہ میں خدمات فراہم کرتے ہیں، اور ان خدمات کے بدلے فیس وصول کی جا سکتی ہے۔ تاہم انہوں نے اس کی تفصیلات نہیں بتائیں۔

آبنائے ہرمز عالمی تیل کی ترسیل کے لیے نہایت اہم سمجھی جاتی ہے، جہاں سے قبل از جنگ دنیا کے تقریباً 20 فیصد حصے کا تیل گزرتا تھا۔ حالیہ کشیدگی کے باعث تیل اور مائع قدرتی گیس (ایل این جی) کی ترسیل میں نمایاں کمی آئی ہے۔

ایران کا مؤقف ہے کہ مستقل امن معاہدے کی صورت میں اس گزرگاہ سے گزرنے والے جہازوں پر فیس عائد کی جا سکتی ہے، جو جہاز کی نوعیت اور کارگو کے مطابق مختلف ہوگی۔ تاہم امریکا نے اس تجویز کی سخت مخالفت کی ہے۔

دوسری جانب اسرائیل نے کہا ہے کہ اس نے ایران کے مغربی اور وسطی علاقوں میں فوجی اہداف کو نشانہ بنایا ہے، جبکہ جاپان نے واضح کیا ہے کہ مئی میں ایک جاپان سے منسلک آئل ٹینکر کے گزرنے پر کوئی فیس ادا نہیں کی گئی۔