ایران کا خلیج عمان میں امریکی جنگی جہازوں پر انتباہی میزائل اور ڈرون فائر کرنے کا دعویٰ

ایران کے سرکاری میڈیا کے مطابق ملک کی بحریہ نے دعویٰ کیا ہے کہ اس نے خلیج عمان میں امریکی جنگی جہازوں پر انتباہی میزائل اور ڈرون فائر کیے ہیں۔ ایرانی بحریہ نے امریکی بحریہ پر سمندری ٹریفک کو ہراساں کرنے اور تجارتی جہازوں اور تیل بردار ٹینکروں کو قبضے میں لینے کا الزام بھی عائد کیا ہے۔

قبل ازیں امریکی انڈو-پیسیفک کمانڈ نے کہا تھا کہ امریکی افواج نے رات گئے بحر ہند میں پابندیوں کا شکار ایک بغیر ریاست (بے وطن) تجارتی جہاز ایم ٹی ڈیوِنا کو روک لیا تھا۔

امریکی کمانڈ نے سوشل میڈیا پلیٹ فارم ’ایکس‘ پر اپنی پوسٹ میں کہا کہ ہم غیر قانونی نیٹ ورکس کو توڑنے اور ایران کو مادی مدد فراہم کرنے والے جہازوں کو روکنے کے لیے عالمی سطح پر بحری قوانین کے نفاذ کو جاری رکھیں گے، خواہ وہ کہیں بھی کام کر رہے ہوں۔

دونوں ممالک کے درمیان یہ تازہ ترین محاذ آرائی ایران کے گرد بحری سلامتی پر بڑھتی ہوئی کشیدگی کے دوران سامنے آئی ہے، جہاں واشنگٹن ایرانی تیل کی ترسیل پر پابندیوں کو سختی سے نافذ کر رہا ہے جبکہ تہران نے بارہا آبنائے ہرمز اور اس کے اطراف میں بحری آمد و رفت کو نشانہ بنانے کی دھمکی دی ہے۔