ڈالر کے مقابلے روپے کی پیش قدمی جاری

انٹربینک مارکیٹ میں جمعہ کو ڈالر کے مقابلے روپے کی قدر میں معمولی اضافہ ریکارڈ کیا گیا۔

کاروبار کے اختتام پر ڈالر کے مقابلے میں روپیہ ایک پیسے کی بہتری سے 278.50 روپے پر بند ہوا۔

یاد رہے کہ پیر کو مقامی کرنسی 278.51 روپے پر بند ہوئی تھی۔

جمعہ کو عالمی مارکیٹ میں بڑی کرنسیوں کے مقابلے میں امریکی ڈالر کی قدر میں گراوٹ کا سلسلہ برقرار رہا اور یہ ہفتہ وار بنیادوں پر خسارے کے ساتھ بند ہونے کی راہ پر گامزن ہے۔

ایشیائی مارکیٹ میں یورو کی قدر 0.03 فیصد اضافے کے ساتھ 1.1653 ڈالر پر پہنچ گئی جبکہ برطانوی پاؤنڈ بغیر کسی بڑی تبدیلی کے 1.3445 ڈالر پر مستحکم رہا۔

آسٹریلوی ڈالر 0.7164 ڈالر پر مستحکم رہا جبکہ نیوزی لینڈ کا ڈالر 0.2 فیصد اضافے کے ساتھ 0.5946 ڈالر پر پہنچ گیا جو کہ گزشتہ دو ہفتوں سے زائد عرصے میں اس کی بلند ترین سطح کے قریب ہے۔

ڈالر انڈیکس جمعرات کو 0.2 فیصد گرنے کے بعد 98.997 پر بڑی حد تک مستحکم رہا۔

امریکی ڈالر اب مسلسل دو ہفتوں سے جاری اپنے اضافے کے تسلسل کو توڑنے کے قریب ہے اور ہفتہ وار بنیادوں پر 0.3 فیصد خسارے کے ساتھ بند ہونے کی راہ پر گامزن ہے۔