قوم آج عیدالاضحی مذہبی عقیدت واحترام کے ساتھ منارہی ہے

مسلمان آج (بدھ ) حضرت ابراہیم علیہ السلام اور حضرت اسماعیل علیہ السلام کی عظیم قربانی کی یاد میں عیدالاضحی مذہبی جوش و جذبے اور عقیدت و احترام کے ساتھ منارہے ہیں۔

کراچی، لاہور، اسلام آباد، پشاور اور کوئٹہ سمیت چھوٹے بڑے شہروں، قصبوں اور دیہات میں نمازِ عید کے بڑے بڑے اجتماعات منعقد ہوئے جہاں لاکھوں فرزندانِ اسلام نے سنتِ ابراہیمیؑ کی پیروی کرتے ہوئے اللہ تعالیٰ کے حضور سجدہ شکر ادا کیا۔

نمازِ عید کے اجتماعات میں علما کرام نے فلسفہ قربانی، ایثار، بھائی چارے اور اتحادِ امت پر خصوصی بیانات دیے۔

خطبات میں امتِ مسلمہ کی سلامتی، ملک کی ترقی، خوشحالی اوراستحکام کیلئے خصوصی دعائیں بھی کی گئیں۔

عیدالاضحیٰ پر کروڑوں مسلمان سنتِ ابراہیمیؑ پر عمل کرتے ہوئے جانوروں کی قربانی کررہے ہیں جبکہ مستحق اور نادار افراد میں گوشت تقسیم کرنے کا سلسلہ بھی جاری ہے۔

وفاقی اور صوبائی حکومتوں نے کسی بھی ناخوشگوار واقعے سے نمٹنے کے لئے سکیورٹی کے جامع انتظامات کئے ہیں۔

مختلف شہروں اور قصبوں کی مقامی انتظامیہ نے عید کے دنوں میں آلائشوں اور دیگر فضلے کو ٹھکانے لگانے کے لئے خصوصی انتظامات کئے ہیں۔

سعودی عرب، متحدہ عرب امارات اور دیگر خلیجی ریاستوں میں بھی عید الاضحیٰ آج منائی جا رہی ہے۔