پاکستان نے دو ایل این جی کارگو کیلئے نیا ٹینڈر جاری کردیا

پاکستان ایل این جی لمیٹڈ (پی ایل ایل) نے بین الاقوامی سپلائرز سے دو ایل این جی کارگو فراہم کرنے کیلئے نیا ٹینڈر جاری کیا ہے، جو ڈیلیورڈ ایکس شپ (ڈی ای ایل) بنیاد پر کراچی کے پورٹ قاسم پر فراہم کیے جائیں گے۔ ہر کارگو کی مقدار 140,000 کیوبک میٹر (تقریباً 100 ایم ایم ایس سی ایف ڈی) مقرر کی گئی ہے، جبکہ ترسیل کی مدت 12 سے 16 مئی اور 24 سے 28 مئی رکھی گئی ہے۔ بولی کی آخری تاریخ 11 مئی ہے۔

ہفتہ کے روز وزیرِ پٹرولیم علی پرویز ملک نے اعلان کیا کہ حکومت طویل المدتی ایل این جی معاہدوں کے شراکت داروں کے ساتھ مذاکرات کر رہی ہے تاکہ گرمیوں کے عروج کے موسم میں سستی بجلی کی پیداوار کیلئے گیس کی فراہمی یقینی بنائی جا سکے۔ اس کے علاوہ حکومت دوست ممالک کے ساتھ اسپاٹ کارگو کی درآمد کے لیے بھی رابطے کر رہی ہے تاکہ بڑھتی ہوئی موسمی طلب کو پورا کیا جا سکے۔

یہ اس ہفتے پاکستان ایل این جی لمیٹڈ کی جانب سے جاری کیا جانے والا دوسرا ٹینڈر ہے۔ 6 مئی کو جاری کیے گئے ایک ٹینڈر میں بھی دو کارگو طلب کیے گئے تھے، تاہم موصول ہونے والی بولیاں مسترد کر دی گئیں، کیونکہ توقع تھی کہ خطے میں کشیدگی کم ہونے سے اسپاٹ ایل این جی کی قیمتیں مزید کم ہو سکتی ہیں اور قطر کی رکی ہوئی سپلائی دوبارہ بحال ہو سکتی ہے۔

مسترد کی گئی بولیوں میں بی پی سنگاپور کی جانب سے 17.28 ڈالر فی ملین برٹش تھرمل یونٹ (ایم ایم بی ٹی یو) اور ٹوٹل انرجیز گیس اینڈ پاور لمیٹڈ کی 16.98 ڈالر فی ایم ایم بی ٹی یو کی پیشکش شامل تھی۔

دیگر سپلائرز میں وٹول بحرین نے 17.84 ڈالر فی ایم ایم بی ٹی یو، او کیو ٹریڈنگ نے 18.58 ڈالر فی ایم ایم بی ٹی یو، سوکار ٹریڈنگ نے 17.21 ڈالر فی ایم ایم بی ٹی یو جبکہ پیٹرو چائنا انٹرنیشنل سنگاپور نے پہلے کارگو کیلئے 17.69 ڈالر اور دوسرے کارگو کیلئے 17.49 ڈالر فی ایم ایم بی ٹی یو کی پیشکش کی تھی۔

کاپی رائٹ بزنس ریکارڈر، 2026