ڈالر کے مقابلے میں روپیہ مزید تگڑا

انٹر بینک مارکیٹ میں جمعرات کو بھی ڈالر کے مقابلے روپے کی قدر میں معمولی اضافہ ریکارڈ کیا گیا اور روپیہ 0.01 فیصد تک تگڑا ہوا۔

کاروبار کے اختتام پر ڈالر کے مقابلے میں روپیہ 3 پیسے کی بہتری سے 278.77 پر بند ہوا۔

قبل ازیں بدھ کو مقامی کرنسی 278.80 روپے پر بند ہوئی تھی۔

دریں اثنا جمعرات کو امریکی ڈالر کی قدر دو ہفتوں سے زائد کی بلند ترین سطح کے قریب برقرار رہی۔

بدھ کو 0.3 فیصد اضافے کے بعد ڈالر انڈیکس 98.852 پر مستحکم رہا جو 13 اپریل کے بعد اس کی بلند ترین سطح کے قریب ہے۔ ایشیائی مارکیٹ میں اب تک یورو 1.1689 ڈالر اور پاؤنڈ (اسٹرلنگ) 1.34877 ڈالر پر ٹریڈ کر رہے ہیں اور ان دونوں کی قدر میں تقریباً 0.1 فیصد اضافہ دیکھا گیا ہے۔

مزید برآں جمعرات کو برینٹ کروڈ (خام تیل) کی قیمتیں چار سال کی نئی بلند ترین سطح پر پہنچ گئیں جس کی وجہ ان خدشات کو قرار دیا جا رہا ہے کہ امریکہ-ایران جنگ شدت اختیار کرسکتی ہے اور مشرقِ وسطیٰ سے تیل کی سپلائی میں طویل تعطل کا سبب بن سکتی ہے جو عالمی معاشی نمو کو متاثر کر سکتا ہے۔

برینٹ کروڈ فیوچرز 4.28 ڈالر یا 3.63 فیصد اضافے کے ساتھ 122.31 ڈالر فی بیرل پر پہنچ گئے جبکہ اس سے قبل کاروبار کے دوران یہ 126.41 ڈالر کی بلند ترین سطح کو چھو چکے تھے جو 9 مارچ 2022 کے بعد سب سے بلند ترین سطح ہے۔

جون کا کنٹریکٹ (معاہدہ) جس میں مسلسل نویں دن اضافہ دیکھا گیا ہے، جمعرات کو ختم ہورہا ہے۔ زیادہ فعال جولائی کا کنٹریکٹ 2.05 ڈالر یا 1.86 فیصد اضافے کے ساتھ 112.49 ڈالر پر رہا۔