عارف حبیب کنسورشیم نے پی آئی اے میں باقی ماندہ 25 فیصد حصص حاصل کر لیے

عارف حبیب کنسورشیم نے حکومت سے پاکستان انٹرنیشنل ایئرلائنز (پی آئی اے) میں باقی ماندہ 25 فیصد حصص حاصل کر کے نجی شعبے کی ملکیت کو 100 فیصد تک بڑھا دیا، جس کا مقصد ستمبر 2026 تک جہازوں کی تعداد 50 تک پہنچانا ہے۔

اے کے ڈی گروپ کے بانی چیئرمین، عقیل کریم ڈھیڈی، جن کا کنسورشیم کے ذریعے مکمل نجی کمپنی میں 10.25 فیصد حصص ہے، نے کہا کہ مالکان نے حکومت کے ساتھ آخری دن یعنی پیر کو 25 فیصد حصص کی قیمت کے لیے 45 ارب روپے کی بینک گارنٹی جمع کرائی۔

گزشتہ سال، کنسورشیم نے پی آئی اے میں 75 فیصد حصص 135 ارب روپے میں حاصل کیے تھے، جس کے ساتھ اعلان کیا گیا تھا کہ تقریباً 125 ارب روپے دوبارہ ایئرلائن میں سرمایہ کاری کیے جائیں گے، جبکہ حکومت کو باقی 10 ارب روپے حاصل ہوئے تھے۔

کنسورشیم کے 100 فیصد حصص حاصل کرنے کے بعد حصص کی تقسیم بتاتے ہوئے، دھیدی نے کہا کہ عارف حبیب کارپوریشن اور فاطمہ فرٹیلائزر کمپنی نے مل کر قومی فضائی ادارے میں 34.1 فیصد حصص رکھے ہیں، جو نجی ملکیت والی پی آئی اے میں سب سے بڑا واحد شیئر ہولڈر بن گئے ہیں۔

فوجی فرٹیلائزر کمپنی لمیٹڈ اب 34 فیصد حصص کی مالک ہے، اس کے بعد لیک سٹی ہولڈنگز (14 فیصد)، اے کے ڈی گروپ ( 10.25فیصد)، اور سٹی اسکولز (7.65 فیصد) ہیں۔

ڈھیڈی نے کہا کہ مالکان نے باقی ماندہ 25 فیصد حصص کے لیے حکومت کے ساتھ 45 ارب روپے کی بینک گارنٹی جمع کرائی ہے۔

کنسورشیم کے پاس اس رقم کی ادائیگی کے لیے ایک سال کا وقت ہے۔

ڈھیڈی کے مطابق ضمانت شدہ رقم پر 12 فیصد کی شرح سے سود ادا کیا جائے گا، اور جتنی جلدی رقم ادا کی جائے گی، سود اتنا ہی کم ہوگا۔

انہوں نے کہا کہ پی آئی اے ستمبر 2026 تک جہازوں کی تعداد 50 تک بڑھانے کا ہدف رکھتی ہے، جبکہ اس وقت صرف 21 آپریشنل طیارے موجود ہیں۔

اے کے ڈی گروپ کے بانی چیئرمین کے مطابق اب تک پی آئی اے کو دنیا بھر سے 120 طیاروں کی پیشکشیں موصول ہو چکی ہیں۔

انہوں نے کہا کہ ایئرلائن کو حج پروازیں چلانے اور نئے داخلی و بین الاقوامی راستوں پر پروازیں کرنے کے لیے مزید طیاروں کی ضرورت ہے۔