غیر ملکی وفود کی آمد کے پیش نظر راولپنڈی میں سکیورٹی سخت

آج نیوز کے مطابق راولپنڈی انتظامیہ نے غیر ملکی وفود کی متوقع آمد کے پیش نظر سکیورٹی اقدامات کے تحت شہر بھر میں شاپنگ مالز، مارکیٹس، ہوٹلز اور دیگر عوامی مقامات کو اگلے نوٹس تک بند کرنے کا فیصلہ کیا ہے۔

مقامی پولیس کے مطابق تمام کاروباری مراکز، شاپنگ مالز، ہوٹلز، پارکس اور کمرشل ہبز آج رات 12 بجے سے بند رہیں گے۔ حکام نے واضح کیا ہے کہ ان پابندیوں کی خلاف ورزی کرنے والوں کے خلاف سخت قانونی کارروائی کی جائے گی۔

یہ سخت اقدامات غیر ملکی وفود کی آمد سے قبل کیے گئے ہیں، اور ان کے دورے کو پرامن اور محفوظ بنانے کے لیے سکیورٹی انتظامات مزید سخت کر دیے گئے ہیں۔

پولیس حکام نے تصدیق کی ہے کہ شہر بھر میں تقریباً 10,000 قانون نافذ کرنے والے اہلکار تعینات کیے گئے ہیں جبکہ تمام داخلی و خارجی راستوں کی سخت نگرانی کی جا رہی ہے۔

تعلیمی اداروں سے متعلق بھی اضافی ہدایات جاری کی گئی ہیں۔ پیر مہر علی شاہ زرعی یونیورسٹی کے بوائز اور گرلز ہاسٹلز سمیت متعدد ہوسٹل بند کر دیے گئے ہیں، اور طلبہ کو فوری طور پر گھروں کو واپس جانے کی ہدایت کی گئی ہے۔

سٹی پولیس آفیسر خالد حمدانی کی زیر صدارت ایک اجلاس میں سکیورٹی انتظامات کا تفصیلی جائزہ لیا گیا، جس میں حکام نے شہریوں سے تعاون کی اپیل کرتے ہوئے کہا کہ وہ سکیورٹی پروٹوکول پر عمل کریں تاکہ امن و امان برقرار رکھا جا سکے۔

شہر میں ہائی الرٹ کے پیش نظر شہریوں کو ہدایت کی گئی ہے کہ وہ احتیاط برتیں، حکام کی تمام ہدایات پر عمل کریں اور محفوظ ماحول برقرار رکھنے میں انتظامیہ کا ساتھ دیں۔