ایرانی حملے میں حیفہ کی رہائشی عمارت براہ راست نشانہ بنی، اسرائیل

اتوار کے روز ایران کی جانب سے داغا گیا ایک میزائل اسرائیل کے شمالی شہر حیفہ میں ایک رہائشی عمارت سے جا ٹکرایا، جس کے نتیجے میں کم از کم چار افراد زخمی ہو گئے۔ اسرائیلی فوج کے مطابق میزائل نے عمارت کو براہِ راست نشانہ بنایا، اور یہ حملہ اس وقت ہوا جب فوج نے ایران کی جانب سے میزائلوں کے ایک نئے حملے کی نشاندہی کی تھی۔

اسرائیلی ایمرجنسی سروس میگن ڈیوڈ آدوم کے مطابق سات منزلہ عمارت مکمل طور پر متاثر ہوئی اور دھماکے سے شدید نقصان پہنچا۔ جائے وقوعہ سے جاری تصاویر اور ویڈیوز میں دیکھا جا سکتا ہے کہ عمارت ملبے کا ڈھیر بن چکی ہے اور علاقے میں دھواں پھیلا ہوا ہے جبکہ امدادی ٹیمیں زخمیوں کو سڑک پر منتقل کر رہی ہیں۔

زخمیوں میں ایک 82 سالہ شخص بھی شامل ہے جس کی حالت تشویشناک بتائی گئی ہے۔ حکام کے مطابق وہ دھماکے اور بھاری ملبے کے باعث زخمی ہوا جبکہ دیگر تین افراد کو شیل کے ٹکڑوں اور دھماکے سے چوٹیں آئیں۔

ریسکیو اہلکاروں کے مطابق عمارت کے نچلے حصوں میں کچھ افراد ملبے تلے دبے ہوئے تھے، جنہیں نکالنے کے لیے امدادی کارروائیاں جاری رہیں۔ ایک زخمی کو بڑی مشکل سے کنکریٹ کے ٹکڑے ہٹا کر نکالا گیا، جبکہ جائے وقوعہ پر بڑے پیمانے پر تباہی کے آثار دیکھے گئے۔