خیبرپختونخوا میں بارشوں سے تباہی، 50 افراد جاں بحق، 111 زخمی، پی ڈی ایم اے

خیبر پختونخوا کی پراونشل ڈیزاسٹر مینجمنٹ اتھارٹی (پی ڈی ایم اے) نے اتوار کے روز 25 مارچ سے شروع ہونے والی مون سون بارشوں کے نتیجے میں ہونے والے جانی و مالی نقصان کی تفصیلی رپورٹ جاری کر دی ہے۔

پی ڈی ایم اے کے مطابق صوبے بھر میں بارشوں کے دوران چھتیں اور دیواریں گرنے کے واقعات میں اب تک 50 افراد جاں بحق اور 111 زخمی ہو چکے ہیں۔ جاں بحق ہونے والوں میں 26 بچے، 17 مرد اور 7 خواتین شامل ہیں، جبکہ زخمیوں میں 45 مرد، 19 خواتین اور 47 بچے شامل ہیں۔

رپورٹ میں املاک کے بڑے پیمانے پر نقصان کی بھی نشاندہی کی گئی ہے۔ صوبے بھر میں کل 470 مکانات متاثر ہوئے، جن میں سے 409 مکانات کو جزوی نقصان پہنچا جبکہ 61 مکانات مکمل طور پر تباہ ہو گئے۔ متاثرہ اضلاع میں بنوں، ایبٹ آباد، مردان، باجوڑ، ہنگو، مہمند، کوہاٹ، شمالی وزیرستان، پشاور، خیبر، نوشہرہ، ڈیرہ اسماعیل خان، کرم، لکی مروت، شانگلہ، بٹگرام، لوئر کوہستان، مانسہرہ، تورغر، سوات، اپر دیر، چارسدہ، بونیر، مالاکنڈ، لوئر دیر، اورکزئی، جنوبی وزیرستان اور ٹانک شامل ہیں۔

ڈی جی پی ڈی ایم اے کا کہنا ہے کہ متاثرہ اضلاع میں ہنگامی امدادی سامان روانہ کر دیا گیا ہے۔ ضلعی انتظامیہ اور ریسکیو 1122 کے ساتھ قریبی رابطہ برقرار ہے، تاکہ امدادی سرگرمیوں کو تیز کر کے متاثرین کو فوری مدد فراہم کی جا سکے۔

پی ڈی ایم اے نے 6 سے 9 اپریل کے درمیان صوبے میں بارشوں کے ایک نئے سلسلے کی پیش گوئی کرتے ہوئے تازہ الرٹ جاری کر دیا ہے۔ شہریوں کو سختی سے مشورہ دیا گیا ہے کہ وہ اس دوران غیر ضروری سفر سے گریز کریں اور خطرناک سیاحتی مقامات سے دور رہیں۔ کسی بھی ناخوشگوار واقعے کی اطلاع دینے یا موسم کی تازہ ترین صورتحال جاننے کے لیے ٹول فری ہیلپ لائن 1700 پر رابطہ کیا جا سکتا ہے۔