سپر نیٹ ٹیکنالوجیز نے انضمام کے بعد شیئرز کی الاٹمنٹ مکمل کر لی

سپر نیٹ ٹیکنالوجیز لمیٹڈ(ایس ٹی ایل) نے کارپوریٹ تنظیمِ نو کے تحت انضمام کے بعد حصص (شیئرز) کی الاٹمنٹ کا اہم مرحلہ مکمل کر لیا ہے۔ کمپنی نے سپر نیٹ لمیٹڈ کے ساتھ انضمام کی منظور شدہ اسکیم کے تحت 10 کروڑ 70 لاکھ سے زائد عام حصص جاری کر دیے ہیں۔

بدھ کو پاکستان اسٹاک ایکسچینج (پی ایس ایکس) کو بھیجے گئے نوٹس میں اس پیشرفت کی تصدیق کی گئی۔

سندھ ہائی کورٹ نے 24 فروری 2026 کو اس انضمام کی منظوری دی تھی۔ طے شدہ فارمولے کے مطابق ایس ٹی ایل کے اہل شیئر ہولڈرز کو ہر ایک حصص کے بدلے 11 نئے حصص جاری کیے گئے ہیں۔ اسی طرح سپر نیٹ لمیٹڈ کے شیئر ہولڈرز کو ان کے ہر ایک شیئر کے عوض ایس ٹی ایل کے تقریباً 1.68 حصص الاٹ کیے گئے ہیں۔

کمپنی کے مطابق جن شیئر ہولڈرز کے اکاؤنٹس سینٹرل ڈیپازٹری سسٹم (سی ڈی ایس) میں ہیں، ان کے حصص کریڈٹ کر دیے گئے ہیں جبکہ دیگر کو فزیکل سرٹیفکیٹس روانہ کیے جا رہے ہیں۔ اس عمل کے بعد سپر نیٹ لمیٹڈ کی آزادانہ حیثیت ختم ہو گئی ہے اور وہ اب ڈی لسٹ ہو کر ایس ٹی ایل میں ضم ہو چکی ہے۔

یکم اپریل 2026 سے اب صرف سپر نیٹ ٹیکنالوجیز (ایس ٹی ایل) ہی اسٹاک ایکسچینج کے مین بورڈ پر ٹریڈنگ کے لیے دستیاب ہوگی۔ اس انضمام کا مقصد گروپ کے ڈھانچے کو بہتر بنانا اور کاروباری امور میں ہم آہنگی پیدا کرنا ہے۔