ٹارگٹڈ فیول سبسڈی : وزیراعظم کا بائیک اور رکشوں کا ڈیٹا ڈیجیٹل کرنے کا حکم

وزیراعظم شہباز شریف نے صوبائی حکومتوں کو ہدایت کی ہے کہ موٹر سائیکل اور رکشہ مالکان کو اپنی گاڑیاں اپنے نام پر رجسٹر کرانے کے لیے تمام ضروری سہولتیں فراہم کی جائیں۔ اس اقدام کا مقصد خصوصی ’فیول سپورٹ پروگرام‘ کی راہ ہموار کرنا ہے، تاکہ کم آمدنی والے طبقے کو عالمی مارکیٹ میں تیل کی قیمتوں میں ہونے والے اتار چڑھاؤ کے اثرات سے بچایا جا سکے۔

اسلام آباد میں اعلیٰ سطح کے جائزہ اجلاس کی صدارت کرتے ہوئے وزیراعظم نے کہا اس اقدام سے ملک بھر میں موٹر سائیکلوں اور رکشوں کے ڈیٹا کو ڈیجیٹل کرنے میں مدد ملے گی اور مالکان مستقبل میں حکومت کے ریلیف اقدامات سے فائدہ اٹھا سکیں گے۔

انہوں نے حکام کو اس سلسلے میں چاروں صوبوں، آزاد کشمیر اور گلگل بلتستان کے چیف سیکرٹریز سے رابطہ کرنے کی بھی ہدایت کی۔

وزیراعظم نے مزید بتایا کہ وفاقی حکومت کفایت شعاری اور ترقیاتی بجٹ میں کٹوتیوں کے ذریعے پہلے ہی 125 ارب روپے کی بچت کر چکی ہے، جسے گزشتہ تین ہفتوں کے دوران پیٹرولیم مصنوعات پر سبسڈی دینے کے لیے استعمال کیا گیا۔ اس مالیاتی مداخلت کا مقصد علاقائی کشیدگی کے باعث بڑھتی ہوئی قیمتوں کے براہِ راست اثرات سے پاکستانی عوام کو محفوظ رکھنا تھا۔

وزیراعظم نے اس بات پر اطمینان کا اظہار کیا کہ پاکستان ایندھن کی طویل قطاروں اور بدنظمی جیسی صورتحال سے بچا رہا، تاہم انہوں نے عوام سے اپیل کی کہ وہ ایندھن کی بچت کی قومی مہم میں بڑھ چڑھ کر حصہ لیں۔ شہریوں کو غیر ضروری سفر سے گریز کرنے کی ترغیب دی گئی ہے جبکہ ایندھن کے استعمال کو کم کرنے کے لیے دفاتر میں میٹنگز کے لیے ٹیلی کانفرنسنگ کو ترجیح دی جا رہی ہے۔

دریں اثنا پیٹرولیم کی سپلائی چین کی نگرانی کے لیے ایک نیا ڈیجیٹل ڈیش بورڈ بھی فعال کر دیا گیا ہے اور اپریل کے لیے درآمدی منصوبوں کو حتمی شکل دے دی گئی ہے۔ ویڈیو لنک کے ذریعے ہونے والے اس اجلاس میں نائب وزیراعظم و وزیر خارجہ اسحاق ڈار، وزیر خزانہ محمد اورنگزیب اور کابینہ کے دیگر سینئر ارکان نے شرکت کی اور معاشی اقدامات کی پیشرفت کا جائزہ لیا۔