مشرق وسطیٰ تنازع کے اثرات، سونے کی قیمتوں میں معمولی اضافہ

عالمی منڈی میں سونے کی قیمتوں میں منگل کے روز معمولی اضافہ ریکارڈ کیا گیا کیونکہ تیل کی ترسیل میں طویل رکاوٹوں کے خدشات کچھ کم ہوئے ہیں، جبکہ سرمایہ کار مشرق وسطیٰ میں جاری تنازع کے معاشی اثرات کا جائزہ لے رہے ہیں۔ اس ہفتے دنیا کے کئی مرکزی بینکوں کی پالیسی فیصلوں پر بھی مارکیٹ کی گہری نظر ہے۔

اسپاٹ گولڈ کی قیمت 0.4 فیصد اضافے کے ساتھ 5,023.19 ڈالر فی اونس تک پہنچ گئی، جبکہ اپریل کی ڈیلیوری کے لیے امریکی گولڈ فیوچرز 0.5 فیصد اضافے کے بعد 5,027.20 ڈالر فی اونس ہو گئے۔

تجزیہ کاروں کے مطابق ہفتے کے آغاز میں سونے کی قیمتوں میں کچھ کمی دیکھنے میں آئی تھی، جو ایران کے وزیر خارجہ کے حالیہ بیان پر مالیاتی منڈیوں کے مثبت ردعمل کی عکاسی کرتی ہے۔ ایران کے وزیر خارجہ عباس عراقچی نے کہا کہ آبنائے ہرمز مکمل طور پر بند نہیں ہے اور کچھ بحری جہاز اس اہم گزرگاہ سے گزرنے میں کامیاب ہوئے ہیں۔

اس کے باوجود خام تیل کی قیمتیں 100 ڈالر فی بیرل سے اوپر برقرار ہیں کیونکہ ایران کے خلاف امریکہ اور اسرائیل کی جنگ کے باعث آبنائے ہرمز کا بڑا حصہ متاثر ہے اور کئی تیل بردار جہاز ہفتوں سے وہاں پھنسے ہوئے ہیں، جس سے عالمی سپلائی کو شدید دھچکا لگا ہے۔

امریکی صدر ڈونلڈ ٹرمپ نے ایک بار پھر دیگر ممالک سے مطالبہ کیا ہے کہ وہ اس آبی گزرگاہ کو کھولنے میں مدد کریں، تاہم ان کا کہنا ہے کہ کوئی بھی ملک اس سلسلے میں تعاون کے لیے تیار نہیں۔

زیادہ تیل کی قیمتیں نقل و حمل اور پیداواری لاگت بڑھا کر مہنگائی کو ہوا دیتی ہیں۔ عام طور پر سونے کو مہنگائی کے خلاف محفوظ سرمایہ کاری سمجھا جاتا ہے، تاہم بلند شرح سود منافع دینے والے اثاثوں کو زیادہ پرکشش بنا دیتی ہے جس سے سونے کی طلب متاثر ہو سکتی ہے۔

ادھر امریکی فیڈرل ریزرو سے توقع کی جا رہی ہے کہ وہ بدھ کو اپنے اجلاس میں شرح سود مسلسل دوسری بار برقرار رکھے گا۔ اس کے علاوہ برطانیہ، یورو زون، جاپان، آسٹریلیا، کینیڈا، سوئٹزرلینڈ اور سویڈن کے مرکزی بینک بھی اسی ہفتے پالیسی اجلاس منعقد کر رہے ہیں۔

دیگر قیمتی دھاتوں میں چاندی کی قیمت 0.6 فیصد اضافے کے ساتھ 81.28 ڈالر فی اونس تک پہنچ گئی۔ پلاٹینم 2.2 فیصد بڑھ کر 2,161.35 ڈالر جبکہ پیلیڈیم 1.4 فیصد اضافے کے بعد 1,620.45 ڈالر فی اونس ہو گیا۔