پاکستان دنیا بھر میں مذہبی رواداری فروغ دینے کیلئے پرعزم ہے، صدر اور وزیراعظم

ریڈیو پاکستان کے مطابق صدر آصف علی زرداری اور وزیراعظم شہباز شریف نے دنیا بھر میں مذہبی رواداری کو فروغ دینے اور مسلمانوں کے لیے تحفظ کے احساس کو یقینی بنانے کے پاکستان کے عزم کو دہرایا ہے۔

آج منائے جانے والے بین الاقوامی دن برائے اسلاموفوبیا کے موقع پر اپنے الگ الگ پیغامات میں صدر اور وزیر اعظم نے بین الاقوامی برادری سے نفرت انگیز جرائم کے خلاف قانونی حفاظتی اقدامات کو مضبوط کرنے کی اپیل کی۔

صدر آصف علی زرداری نے کہا کہ یہ دن مسلم کمیونیٹیز کو درپیش تعصب اور تشدد میں اضافے کی نشاندہی کرتا ہے اور مذہبی تنوع کے احترام اور رواداری کی ضرورت پر زور دیتا ہے۔ انہوں نے کہا کہ اسلام کو انتہا پسندی یا تشدد سے جوڑنے کی کوششیں جہالت کی علامت ہیں اور تہذیبوں کے درمیان مکالمے اور باہمی سمجھ بوجھ کے فروغ کی کوششوں کو کمزور کرتی ہیں۔

اپنے پیغام میں وزیراعظم محمد شہباز شریف نے کہا کہ سماجی عدم رواداری بنیادی مذہبی آزادی اور باہمی اتحاد و رواداری جیسے اقدار کو کمزور کرنے کا سبب بنتی ہے۔ شہباز شریف نے کہا کہ پاکستان نے ہمیشہ تمام بین الاقوامی فورمز پر ذمہ دارانہ انداز میں اسلاموفوبیا کے خلاف آواز بلند کی ہے۔

علاوہ ازیں، وزیر خارجہ اسحق ڈارپ نے بین الاقوامی برادری سے بڑھتے ہوئے اسلاموفوبیا کے خلاف اتحاد کی اپیل کرتے ہوئے پاکستان کے عزم کو دہرایا کہ وہ مذہبی اور ثقافتی رواداری، احترام اور پرامن بقائے باہمی کو فروغ دے گا۔

انہوں نے کہا کہ پاکستان نے اسلامی تعاون تنظیم (او آئی سی) کے تعاون سے اقوام متحدہ کی جنرل اسمبلی کے اس فیصلے میں اہم کردار ادا کیا کہ 15 مارچ کو بین الاقوامی دن برائے اسلاموفوبیا کے طور پر منایا جائے، جسے مذہبی، ثقافتی اور تہذیبی ہم آہنگی اور پرامن بقائے باہمی کے عالمی اقدامات میں سنگ میل قرار دیا گیا۔

ڈپٹی وزیراعظم نے حالیہ رجحانات کی طرف اشارہ کرتے ہوئے کہا کہ اسلاموفوبیا میں اضافہ دنیا بھر میں تشویشناک واقعات میں ظاہر ہوا ہے، جن میں قرآن مقدس کی بے حرمتی، حجاب پہننے والی خواتین پر حملے، مساجد کی توڑ پھوڑ اور عوامی بیان اور میڈیا میں مسلم مخالف رائے شامل ہیں۔

انہوں نے کہا کہ ایسے اقدامات کشیدگی اور تنازعات کو بڑھاتے ہیں اور ایک ایسا گھمبیر صورتحال پیدا کرتے ہیں جو بین الاقوامی امن و سلامتی کے لیے خطرہ ہے۔