بلوچستان میں کارروائیوں کے دوران 8 دہشت گرد ہلاک ہوگئے، آئی ایس پی آر

انٹر سروسز پبلک ریلیشنز (آئی ایس پی آر) نےاتوار بتایا کہ سیکیورٹی فورسز نے 17 اکتوبر کو بلوچستان کے کوئٹہ، نوشکی اور خضدار اضلاع میں انٹیلی جنس پر مبنی تین کارروائیوں میں آٹھ دہشت گردوں کو ہلاک کیا۔

ایک بیان میں فوج کے شعبہ تعلقات عامہ نے کہا کہ ان کارروائیوں میں ان دہشت گردوں کو نشانہ بنایا گیا جن کا تعلق بھارت کے حمایت یافتہ گروپ فتنۃ الہندوستان سے تھا۔

آئی ایس پی آر کے مطابق کوئٹہ کے علاقے پنجپائی میں سکیورٹی فورسز نے دہشت گردوں کی جانب سے مقامی ٹریفک میں خلل ڈالنے کے لیے سڑک پر رکاوٹ کھڑی کرنے کی کوشش ناکام بنا دی اور 5 دہشت گردوں کو ہلاک کر دیا۔

بیان میں کہا گیا کہ نوشکی میں ایک الگ کارروائی کے دوران سکیورٹی فورسز نے دہشت گردوں کے ٹھکانے پر چھاپہ مارا اور شدید فائرنگ کے تبادلے کے بعد 2 دہشت گردوں کو ہلاک کر دیا۔ کارروائی کے دوران اسلحہ اور گولہ بارود بھی برآمد کیا گیا۔

آئی ایس پی آر نے مزید بتایا کہ خضدار میں انٹیلی جنس کی بنیاد پر کی گئی کارروائی کے دوران سکیورٹی فورسز نے دہشت گردوں کے ایک ٹھکانے کو نشانہ بنایا، جس کے نتیجے میں ایک دہشت گرد ہلاک ہوا، جبکہ 490 کلوگرام دھماکا خیز مواد بھی برآمد کیا گیا۔

بیان کے مطابق ان علاقوں میں موجود دیگر دہشت گردوں کے خاتمے کے لیے کلیئرنس آپریشنز جاری ہیں۔

آئی ایس پی آر نے کہا کہ سکیورٹی فورسز اور قانون نافذ کرنے والے ادارے قومی ایکشن پلان پر وفاقی ایپکس کمیٹی کی جانب سے منظور کردہ وژن عزمِ استحکام کے تحت انسدادِ دہشت گردی کی کارروائیاں جاری رکھیں گے، تاکہ ملک سے اس کے بقول بیرونی سرپرستی اور حمایت یافتہ دہشت گردی کا خاتمہ کیا جا سکے۔