فلسطینی علاقوں میں اسرائیلی آباد کار حملے میں تین فلسطینی شہید

فلسطینی حکام اور اسرائیلی فوج نے اتوار کو بتایا کہ مقبوضہ مغربی کنارے میں اسرائیلی آباد کاروں کے حملے میں تین فلسطینی شہید ہوگئے، جو گذشتہ دو دنوں میں دوسرا مہلک واقعہ ہے۔

فلسطینی وزارت صحت کے مطابق ابو فلاح کے قصبے میں اسرائیلی آباد کاروں نے 24 سالہ ثائر فاروق حمائل اور 57 سالہ فریا جواد حمائل کو گولی مار کر شہید کردیا۔ وزارت صحت نے واقعے کے وقت یا دیگر تفصیلات فراہم نہیں کیں۔

فلسطینی نائب صدر حسین الشیخ نے ایک بیان میں اس بے رحمانہ حملے کی مذمت کی اور کہا کہ تین افراد شہید اور سات دیگر زخمی ہوئے۔

اسرائیلی فوج نے کہا کہ اہلکار ابو فلاح بھیجے گئے تاکہ فلسطینی شہریوں پر اسرائیلی آباد کاروں کے حملے کی رپورٹ کا جواب دیا جاسکے۔ بعد میں اطلاع ملی کہ دو فلسطینی فائرنگ سے شہید ہوئے اور ایک فرد دم گھٹنے سے مر گیا۔

مقامی اسرائیلی فوج کے سربراہ میجر جنرل آوی بلوٹھ نے کہا کہ یہ ناقابل قبول واقعہ ہے۔ قانون کو اپنے ہاتھ میں لینے والے شہریوں کے لیے صفر رواداری ہوگی۔ یہ کارروائیاں خطرناک ہیں اور یہ یہودی عوام یا اسرائیل ریاست کی نمائندگی نہیں کرتیں۔

مقبوضہ مغربی کنارے میں تشدد میں اضافہ ہوچکا ہے، جو اکتوبر 2023 میں غزہ جنگ کے بعد حماس کے اسرائیل حملے کے بعد جاری ہے۔

گذشتہ روز رام اللہ کی وزارت صحت اور ایک مقامی میئر نے بتایا کہ وادی الرحیم کے ایک اور گاؤں میں اسرائیلی آباد کاروں نے ایک فلسطینی شخص کو گولی مار کر شہید اور اس کے بھائی کو زخمی کیا۔

اسرائیلی فوج نے کہا کہ فوجی اور پولیس بھیجے گئے تاکہ اسرائیلی اور فلسطینیوں کے درمیان شدید تصادم کی تحقیقات کی جاسکیں۔

غزہ جنگ کے آغاز کے بعد سے اسرائیلی آباد کاروں یا فوج نے مقبوضہ مغربی کنارے میں کم از کم 1,043 فلسطینی شہید کیے، جن میں زیادہ تر مسلح تھے لیکن کئی عام شہری بھی شامل ہیں۔ اسرائیلی اعداد و شمار کے مطابق کم از کم 45 اسرائیلی ہلاک ہوچکے ہیں، جن میں فوجی اور عام شہری شامل ہیں۔