ٹی پی ایل انشورنس کی فروخت کے لیے ٹی پی ایل کارپوریشن اور جاز انٹرنیشنل میں معاہدہ

ٹی پی ایل کارپوریشن لمیٹڈ نے اپنی ذیلی کمپنی ’ٹی پی ایل انشورنس لمیٹڈ‘ کے حصص (شیئرز) کی فروخت اور کنٹرول کی منتقلی کے لیے جاز انٹرنیشنل ہولڈنگ لمیٹڈ کے ساتھ شیئر پرچیز ایگریمنٹ (ایس پی اے) کرلیا ہے۔

لسٹڈ کمپنی نے جمعہ کو پاکستان اسٹاک ایکسچینج کو بھیجے گئے ایک نوٹس میں اپنے اسٹیک ہولڈرز کو اس حوالے سے آگاہ کیا۔

نوٹس میں کہا گیا کہ یہ ہماری 17 دسمبر 2025 کی سابقہ تشہیر کا تسلسل ہے جس میں ٹی پی ایل کارپوریشن کے بورڈ آف ڈائریکٹرز نے ٹی پی ایل انشورنس لمیٹڈ کے حصص اور کنٹرول حاصل کرنے کیلئے جاز انٹرنیشنل ہولڈنگ لمیٹڈ کے ساتھ شیئر پرچیز ایگریمنٹ کرنے کی منظوری دی تھی۔

نوٹس میں کہا گیا کہ ہمیں یہ اعلان کرتے ہوئے خوشی ہو رہی ہے کہ کمپنی نے 5 مارچ 2026 کو خریدار کے ساتھ حصص کی خریداری کا معاہدہ کر لیا ہے، جس کے تحت خریدار کمپنی سے ’ٹی پی ایل انشورنس لمیٹڈ‘ کے حصص اور کنٹرول حاصل کرے گا۔

کمپنی نے مزید بتایا کہ اس لین دین کی تکمیل کچھ شرائط پر منحصر ہے، بشمول جاز انٹرنیشنل ہولڈنگ لمیٹڈ کی جانب سے مطلوبہ ریگولیٹری منظوریوں کا حصول۔

8 ستمبر کو ٹی پی ایل کارپوریشن لمیٹڈ کے بورڈ آف ڈائریکٹرز نے ابتدائی طور پر ایک ایسے معاہدے پر اتفاق کیا تھا جس کے تحت جاز انٹرنیشنل ہولڈنگ لمیٹڈ، ٹی پی ایل انشورنس لمیٹڈ کے حصص خریدے گی اور اس کا کنٹرول حاصل کرے گی۔

شروع میں خریدار کے طور پر ویون گروپ ہولڈنگ کمپنی لمیٹڈ یا اس سے وابستہ کمپنیوں کا ذکر کیا گیا تھا۔ بعد ازاں باضابطہ طور پر اس کی تصدیق کی گئی اور اسے تبدیل کر کے جاز انٹرنیشنل ہولڈنگ لمیٹڈ کrدیا گیا۔