امریکا میں برفانی طوفان سے نظام زندگی منجمد، دفاتر اور سکول بند،سفری نظام درہم برہم

امریکا میں شدید برفانی طوفان نے نظام زندگی منجمد کردیا، شمال مشرقی امریکہ کے کئی حصوں میں پیر کو اسکول بند رہیں گے اور شہری گھر پر رہنے کی ہدایات پر عمل کریں گے کیونکہ ایک طاقتور موسم سرما کے طوفان نے پورے خطے کو اپنی لپیٹ میں لے لیا ہے۔ حکام نے شدید برفباری، تیز ہواؤں اور خطرناک سفری حالات کی وارننگ جاری کی ہے جس کے باعث دفاتر اور ٹرانزٹ سسٹم ہنگامی نظام الاوقات پر منتقل ہوگئے ہیں۔

طوفان نے واشنگٹن سے نیو انگلینڈ تک کے سفر کو بری طرح متاثر کیا ہے، ایئر لائنز نے ہزاروں پروازیں منسوخ کی ہیں اور حکام نے شہریوں کو غیر ضروری سڑکوں سے دور رہنے کی ہدایت کی ہے۔ امریکی محکمہ ڈاک کا کہنا ہے کہ شمال مشرق میں موسم کی یہ شدت ڈاک اور پارسلز کی پروسیسنگ، ترسیل اور ڈلیوری کے عمل کو بھی سست کرسکتی ہے۔

نیو یارک سٹی کے سب سے بڑے اسکول ڈسٹرکٹ نے تمام سرکاری اسکول بند رکھنے کا حکم جاری کیا ہے جس کے تحت نہ تو آن لائن کلاسز ہوں گی اور نہ ہی اسکول کے بعد کے کسی پروگرام کا انعقاد کیا جائے گا، شہری دفاتر بھی ذاتی خدمات کے لیے بند رہیں گے۔

میئر ظہران ممدانی نے ہنگامی حالت کا اعلان کرتے ہوئے شہریوں سے درخواست کی ہے کہ براہ کرم اس طوفان کے دوران گھر پر رہیں۔ انہوں نے اتوار کی رات سے پیر کی دوپہر تک غیر ضروری گاڑیوں کو سڑکوں سے ہٹانے کا حکم دیا ہے۔ ان کا کہنا ہے کہ برف باری میں شدت کے باعث برف ہٹانے والی مشینوں اور ہنگامی عملے کو راستہ دینے کے لیے سڑکوں کا خالی ہونا ضروری ہے۔

یہ وارننگ شہر کے لیے 2017 کے بعد برفانی طوفان کی پہلی اہم الرٹ ہے۔