ٹی20 ورلڈ کپ: پاکستان اور نیوزی لینڈ کا میچ بارش کی نذر ہوگیا

سری لنکا کے رانا سنگھے پریماداسا اسٹیڈیم میں ہفتے کے روز مسلسل بارش کی وجہ سے نیوزی لینڈ اور پاکستان کے درمیان ٹی 20 ورلڈ کپ کے سپر ایٹ مرحلے کا افتتاحی میچ منسوخ کردیا گیا جبکہ دونوں ٹیموں کو ایک ایک پوائنٹ مل گیا۔

قبل ازیں پاکستان کے کپتان سلمان آغا نے گروپ ٹو کے اس میچ میں ٹاس جیت کر بیٹنگ کا فیصلہ کیا، تاہم کھیل شروع ہی نہ ہو سکا کیونکہ بارش شدت اختیار کرتی گئی اور گراؤنڈ کے کورز پر پانی جمع ہو گیا۔

منگل کو دو سابق چیمپئنز کے درمیان ٹاکرے میں پاکستان کا مقابلہ انگلینڈ سے ہوگا، جبکہ نیوزی لینڈ بدھ کو ٹورنامنٹ کے شریک میزبان سری لنکا سے کھیلے گا۔

ہلکی بوندا باندی کے بعد شدید بارش شروع ہو گئی اور ایک گھنٹہ 10 منٹ سے زائد تاخیر کے بعد اوورز ضائع ہونے لگے۔

اس صورتحال کے پیش نظر فیصلہ کیا گیا کہ اگر مقامی وقت کے مطابق رات 10:16 بجے ( عالمی معیاری وقت 4 بج کر 46 منٹ) تک 5 ، 5 اوورز کا میچ بھی ممکن نہ ہوسکا تو میچ کو بے نتیجہ قرار دیا جائے گا اور دونوں ٹیموں کو ایک ایک پوائنٹ ملے گا۔

پاکستان، نیوزی لینڈ، انگلینڈ اور میزبان سری لنکا سپر ایٹ کے گروپ 2 میں ہیں۔

ٹائٹل ہولڈرز بھارت، جنوبی افریقہ، زمبابوے اور ویسٹ انڈیز گروپ 1 میں شامل ہیں۔

ہر گروپ کی دو بہترین ٹیمیں سیمی فائنل کے لیے کوالیفائی کریں گی۔