جنوری میں پاکستان کو 121 ملین ڈالر کا کرنٹ اکاؤنٹ سرپلس حاصل

اسٹیٹ بینک آف پاکستان کی جانب سے منگل کو جاری کردہ اعداد و شمار کے مطابق پاکستان نے جنوری 2026 میں 121 ملین ڈالر کا کرنٹ اکاؤنٹ سرپلس ریکارڈ کیا ہے۔

تاہم مجموعی طور پر جولائی تا جنوری مالی سال 2026 کے دوران ملک کو 1.07 ارب ڈالر کے کرنٹ اکاؤنٹ خسارے کا سامنا رہا، جب کہ گزشتہ مالی سال کے اسی عرصے میں 560 ملین ڈالر کا سرپلس حاصل ہوا تھا۔

جنوری کے دوران پاکستان کو ورکرز ریمیٹنس کی مد میں 3.46 ارب ڈالر موصول ہوئے، جبکہ دسمبر 2025 میں یہ رقم 3.59 ارب ڈالر تھی۔

ماہانہ بنیاد پر بیرونی کھاتہ دسمبر 2025 کے 270 ملین ڈالر خسارے سے بہتر ہو کر جنوری 2026 میں 120 ملین ڈالر سرپلس میں تبدیل ہو گیا۔

مالی سال 2026 کے پہلے سات ماہ کے دوران بلند درآمدی ادائیگیوں کے باعث بیرونی شعبہ دباؤ میں رہا۔ درآمدات میں اضافہ بحال ہوتی مقامی طلب اور سپلائی رکاوٹوں میں کمی کی عکاسی کرتا رہا، جبکہ برآمدات کی نمو نسبتاً کمزور رہی۔

اعداد و شمار کے مطابق اس عرصے میں تجارتی خسارہ بلند سطح پر برقرار رہا کیونکہ درآمدات کی رفتار برآمدات سے زیادہ رہی، جو معاشی معمول پر واپسی اور درمیانی و سرمایہ جاتی اشیا کی بڑھتی طلب کا نتیجہ ہے۔

دریں اثناء فروری کے اوائل تک اسٹیٹ بینک کے پاس موجود زرمبادلہ کے ذخائر 16.18 ارب ڈالر کی سطح پر تھے۔