سی ای او سی بی ڈی پنجاب کا منصوبوں کا مانیٹرنگ نظام مزید مضبوط بنانے کا حکم

پنجاب سینٹرل بزنس ڈسٹرکٹ ڈویلپمنٹ اتھارٹی (پی سی بی ڈی ڈی اے ) کے سی ای او عمران امین نے اعلیٰ سطح اجلاس کی صدارت کی ،جس میں جاری منصوبوں کے معیار، فنشنگ اور حفاظتی انتظامات کا جائزہ لیا گیا۔ اجلاس کا محور اس بات کو یقینی بنانا تھا کہ تمام ترقیاتی کام بین الاقوامی تعمیراتی معیارات اور کام کی جگہ کے حفاظتی اصولوں کے مطابق مکمل کیے جائیں۔

ایگزیکٹو ڈائریکٹر ٹیکنیکل ریاض حسین نے سی ای او اور سی او او بریگیڈیئر (ریٹائرڈ) منصور جنجوعہ کو مختلف مقامات پر استعمال ہونے والے تعمیراتی مواد کے معیار پر بریفنگ دی۔ اس موقع پر سی بی ڈی پنجاب کے اہم منصوبے ورٹیکس کی فنشنگ، ٹائلوں کی تنصیب اور ایلیویشن کے کاموں پر تفصیلی بریفنگ دی گئی۔

سی ای او عمران امین نے کام کی رفتار اور معیار پر اطمینان کا اظہار کرتے ہوئے ہدایت کی کہ تمام منصوبوں پر اسی تسلسل کو برقرار رکھا جائے۔ اجلاس میں حفاظتی اقدامات پر خصوصی زور دیا گیا۔

عمران امین نے حکم دیا کہ تعمیراتی مواد کو محفوظ طریقے سے ذخیرہ کیا جائے اور خاص طور پر سیوریج کے لیے کی جانے والی کھدائی کے مقامات کی مناسب ناکہ بندی کی جائے، تاکہ کسی بھی ناخوشگوار واقعے سے بچا جا سکے۔

انہوں نے واضح کیا کہ شہری ترقی کے ساتھ ساتھ شہریوں اور ورکرز کا تحفظ اولین ترجیح ہے اور حفاظتی اقدامات میں کسی بھی قسم کی غفلت برداشت نہیں کی جائے گی۔ اجلاس کے اختتام پر اعلیٰ معیار اور پائیدار انفرااسٹرکچر کی فراہمی کے لیے مانیٹرنگ کے نظام کو مزید مضبوط بنانے کی ہدایات جاری کی گئیں۔