میانوالی: سی ٹی ڈی کی کارروائی، 6 دہشت گرد اپنے ہی ساتھیوں کی فائرنگ سے ہلاک
- 8 دہشت گرد اندھیرے کا فائدہ اٹھاتے ہوئے فرار ہونے میں کامیاب ہوگئے، ترجمان
میانوالی میں چاپڑی ڈیم کے قریب دہشت گردی کا ایک بڑا خطرہ ٹال دیا گیا جہاں کاؤنٹر ٹیررازم ڈپارٹمنٹ (سی ٹی ڈی) کی جانب سے کی گئی ایک انٹیلی جنس بیسڈ آپریشن کے دوران 6 دہشت گرد ہلاک ہوگئے۔
ترجمان سی ٹی ڈی کے مطابق سی ٹی ڈی نے دہشت گردوں کی گرفتاری کیلئے انٹیلی جنس بیسڈ کارروائی کی، اسی دوران دہشت گردوں نے سی ٹی ڈی ٹیم پر فائرنگ کردی۔
سی ٹی ڈی نے دعویٰ کیا کہ فائرنگ کے تبادلے میں 6 خطرناک دہشت گرد اپنے ہی ساتھیوں کی فائرنگ سے ہلاک ہوگئے جب کہ 8 دہشت گرد اندھیرے کا فائدہ اٹھاتے ہوئے فرار ہونے میں کامیاب ہوگئے۔
ہلاک دہشت گردوں کے قبضے سے ایک خودکش جیکٹ، تین دستی بم، ایک سب مشین گن، دو سو گولیاں اور دیگر بارودی مواد برآمد کیا گیا ہے۔
تحقیقات سے معلوم ہوا ہے کہ اس گروہ نے پولیس اور دیگر قانون نافذ کرنے والے اداروں کو نشانہ بنانے کا جامع منصوبہ بنا رکھا تھا۔ ترجمان کے مطابق بروقت کارروائی نے بڑے پیمانے پر ہونے والی اس سازش کو ناکام بنا دیا۔
حکام کے مطابق ہلاک دہشت گردوں کی شناخت کا عمل جاری ہے جبکہ فرار ہونے والے دہشت گردوں کی گرفتاری کیلئے علاقے میں سرچ آپریشن کیا جارہا ہے۔
سی ٹی ڈی کا کہنا ہے کہ بروقت کارروائی کے ذریعے ایک بڑی دہشت گردی کی سازش کو ناکام بنادیا گیا ہے، سکیورٹی ادارے صورتحال پر مسلسل نظر رکھے ہوئے ہیں۔
واضح رہے کہ پاکستان میں 2025 میں دہشت گردانہ حملوں میں نمایاں اضافہ دیکھنے میں آیا جن کی تعداد گزشتہ سال کے مقابلے میں 34 فیصد بڑھ گئی۔
Comments