ٹوکیو چڑیا گھر میں پانڈاز کی چین روانگی سے قبل مداحوں کا رش

ٹوکیو کے اوئینو چڑیا گھر میں اتوار کے روز پانڈا کے مداحوں کی بڑی تعداد اپنے پسندیدہ دیوہیکل پانڈا کو الوداع کہنے کے لیے امڈ آئی، کیونکہ رواں ماہ کے اختتام پر انہیں چین واپس بھیجا جا رہا ہے۔ چار سالہ جڑواں پانڈاز شیاو شیاو اور لی لی کی روانگی کے بعد 1972 کے بعد پہلی بار جاپان میں کوئی پانڈا موجود نہیں ہوگا، جس پر شہریوں میں گہری اداسی پائی جاتی ہے۔ آخری دیدار کے لیے ہزاروں افراد نے لاٹری کے ذریعے ٹکٹ حاصل کرنے کی کوشش کی۔

مالیاتی شعبے سے وابستہ 54 سالہ ماچیکو سیکھی نے بتایا کہ وہ اس وقت سے آ رہی ہیں جب ان جڑواں پانڈاز کے والدین یہاں موجود تھے۔ ان کے بقول ایسا محسوس ہو رہا ہے جیسے ایک خاندان کی کہانی اپنے اختتام کو پہنچ رہی ہو۔ اگرچہ پانڈاز کی چین منتقلی کا منصوبہ کافی عرصے سے طے تھا، لیکن ان کی رخصتی کو حالیہ مہینوں میں چین اور جاپان کے تعلقات میں کشیدگی کی علامت کے طور پر بھی دیکھا جا رہا ہے۔ نومبر میں جاپانی وزیر اعظم سانے تاکائیچی نے کہا تھا کہ اگر چین نے تائیوان پر حملہ کیا تو جاپان فوجی ردعمل دے سکتا ہے، جس پر بیجنگ نے سخت ردعمل دیا تھا۔

اتوار کو تاہم سیاسی معاملات بہت سے افراد کی توجہ کا مرکز نہیں تھے۔ زائرین کو صرف ایک منٹ کے لیے پانڈاز دیکھنے کی اجازت دی گئی۔ ماچیکو سیکھی نے کہا کہ پانڈاز نے انہیں توانائی، حوصلہ اور ذہنی سکون دیا، اسی لیے وہ شکریہ ادا کرنے آئی ہیں۔ کچھ افراد ایسے بھی تھے جنہیں لاٹری میں ٹکٹ نہیں ملا، مگر وہ پھر بھی چڑیا گھر پہنچے۔ 49 سالہ آکیکو کاواکامی نے کہا کہ وہ صرف اس لیے آئیں کہ وہ پانڈاز کے ساتھ ایک ہی فضا میں سانس لے سکیں۔