وزیراعظم کا مشترکہ کوششوں کے ذریعے دہشت گردی کو شکست دینے کا عزم

وزیرِ اعظم محمد شہباز شریف نے دہشت گردی اور انتہا پسندی جیسے چیلنجز سے نمٹنے کے لیے اتحاد کی ضرورت پر زور دیا ہے۔اس عزم کا اظہار انہوں نے اسلام آباد میں قومی پیغامِ امن کمیٹی کے ارکان سے ملاقات کے دوران کیا۔

وزیرِ اعظم ہاؤس کے مطابق وزیرِ اعظم نے اس اعتماد کا اظہار کیا کہ یہ کمیٹی انتہا پسندی اور دہشت گردی کے خلاف قومی بیانیے کو مضبوط بنانے میں کلیدی کردار ادا کرے گی، بالکل ویسا ہی تاریخی کردار جیسا علمائے کرام اور مشائخ نے قیامِ پاکستان کے وقت ادا کیا تھا۔ انہوں نے کہا کہ پاکستان امن، انصاف اور رواداری کے اصولوں کے نفاذ کے لیے بنایا گیا تھا اور آج اتحاد کی ضرورت پہلے سے کہیں زیادہ ہے۔

انہوں نے پاکستان کی ترقی میں اقلیتوں کے نمایاں کردار اور تعلیم، صحت اور دفاع سمیت مختلف شعبوں میں ان کی گرانقدر خدمات کی تعریف کی۔ شہباز شریف نے خاص طور پر سیسل چوہدری اور جسٹس رانا بھگوان داس کا ذکر کرتے ہوئے ان کی پاکستان کے لیے وابستگی اور ناقابلِ فراموش کردار کو سراہا۔

وزیرِ اعظم نے کہا کہ اللہ تعالیٰ نے پاکستان کو ٹریلین ڈالرز کے وسیع قدرتی وسائل سے نوازا ہے، جنہیں اگر مؤثر طریقے سے تلاش کیا جائے تو غربت، بے روزگاری اور قرضوں جیسے مسائل پر قابو پایا جا سکتا ہے۔ انہوں نے کہا کہ ملک اب تیزی سے خوشحالی اور استحکام کی طرف بڑھ رہا ہے، تاہم دہشت گردی کا جڑ سے خاتمہ وقت کی اہم ضرورت ہے۔

دہشت گردی کے خلاف جنگ میں قوم اور مسلح افواج کی قربانیوں کا ذکر کرتے ہوئے وزیرِ اعظم نے کہا کہ پاکستان نے مئی 2025 میں ”معرکہ حق“ کے دوران اپنی طاقت کا مظاہرہ کیا جب اس نے بھارت کو فیصلہ کن شکست دی۔ انہوں نے اس کامیابی کو اللہ کا فضل اور چیف آف ڈیفنس فورسز و چیف آف آرمی اسٹاف فیلڈ مارشل سید عاصم منیر کی قیادت میں مسلح افواج کی پیشہ ورانہ صلاحیتوں کا نتیجہ قرار دیا۔

انہوں نے مزید کہا کہ عالمی برادری پاکستان کی عظیم قربانیوں کا اعتراف کرے، کیونکہ ملک کے پاس پاکستان میں دہشت گرد عناصر کو ملنے والی بیرونی امداد کے ٹھوس شواہد موجود ہیں۔ وزیرِ اعظم نے حکومتی عزم کا اعادہ کیا کہ دہشت گردی کو متحدہ قومی کوششوں کے ذریعے شکست دی جائے گی۔

اس موقع پر وفاقی وزیرِ اطلاعات عطا اللہ تارڑ نے کہا کہ دہشت گردی کے خاتمے اور امن و استحکام کے فروغ کے لیے قومی بیانیے کو مزید تقویت دی جائے گی۔ انہوں نے بتایا کہ کمیٹی کے ارکان ملک کے مختلف شہروں کا دورہ کریں گے ،تاکہ امن کا پیغام عام اور نفرت انگیز بیانیے کا مقابلہ کیا جا سکے۔

کمیٹی کے کنوینر مولانا حافظ طاہر محمود اشرفی، علامہ راغب نعیمی اور دیگر علمائے کرام نے ملک سے دہشت گردی اور انتہا پسندی کے خاتمے کے لیے حکومتی کوششوں کی مکمل حمایت کے عزم کا اظہار کیا۔